Бесплатный фрагмент - Ютан велева

Инечи

Ёвтнема

«Есть праздники, которые имеют свой запах. На Пасху, Троицу и на Рождество в воздухе пахнет чем-то особенным. Даже неверующие любят эти праздники. Мой брат, например, толкует, что Бога нет, а на Пасху первый бежит к заутрене»

А. П. Чехов, рассказ «На пути».

Тундо. Ловось ванстызе ашо калгодо рунгинензэ ансяк таркань-таркань. Невтемга, минек кардазонть удало, козонь чипаесь вийтеме токши чокшне малав. Ютынь ловонть ланга — кеме, кирди сталмом, лангсонзо чалгавкстнэяк а содавить. Мон тонавтнян котоце классо ды мездеяк а мелявтан.

Ванды — Инечи. Коштось ушосонть теке Пазонь. Валось те покш, аламодо ачарькодевикс ды мазый. Пертьпельксэсь истямо вадря, прок панжи те покш валонть смустензэ.

Эрьбань кавшаня тарадтнэ аштить икелькс кудосо, пазава ало, суликань покш кедьгесэ. Кудотне покшчинтень кайтянь-кайтянь шлязь-урядазь исень чиденть икеле. Теньсэ лездынь монгак — ливтнинь ушов рудазов ведь марто ведратнень, чукинь пирявкс ланга кайсезь алкстнэнь.

Удомо течи карман сырькаень кедьсэ. Пелеветь мельган сови Тёма (сон эри сырькаень шабрасо), ды минь вейсэ сыргатано алонь пурнамо. Кода вадря! Тень апак визде чарькодезь, ластян1 кенярксчинть ды чиезь чиян велеванть Куншкакуров, сырькайнень.

Куринкатнева налксезь чарыть чудикерькстнэ, шлить ожо луганть ды чопода рудазонть. Маряви, весемесь учи Инечинть, весемесь сюлмавозь сонзэ марто. Тундодонть сундерьгадозь кудотнень икеле аштить инжетнень машинаст, велень лавкасонть пивтезь пивтить ломантне, рамсить эрьва кодат ламбамкайть.

Токинь Тёманень. Сон ушосо, нолдтни цецяпирестэ чудикерькст. Кедьсэнзэ койме.

— Мезть, шабра? — мизолдозевсь Тёма.

— Мезтькак, — мизолдозевинь монгак.

— Вант, иля удово, кода мелят! — мерсь Тёма ды ёроковсто пезнавтызе койменть модас.

— Вант, тонсь иля матедеве! — окойники муинь мезе меремс каршонзо.

— Эно варштасынек! — эзь кадово Тёма, ды минь явинек.

Тёма тонавтни кавксоце классо, тедеде сон меельцеде моли алонь пурнамо. Минек велесэ ладявсь кой — вейксэцесэ тонавтницятне уш а якить алонь пурнамо. Тевесь те, весе содыть, тунь аволь стяконь — эряви икелепелев ладямс, кинь марто сыргат, арсемс весементь.

Мелят, зярдо Тёма совась мельган, мон удынь, ды сырькаем эзимим пувта. Тёма пурнась алт Мишань марто. Мон, зярдо сыргозинь, туинь алонь пурнамо теке латякарь — ськамон… Содазь, ков седе рана сыргат, тов седе вадря. Зэмесь сеньсэ: пелевентькак апак учне якамс велеванть юдмине марто ды пувтнемс удыця кудазортнэнь. Вадря, бути сынь а стить, а панжсызь кенкшенть. Сестэ уш налксек: синдтрек пирявксонь ганкат, ёртнек вальмалга пенгеть!

Совинь сырькайнень. Каштомикеле — чувтонь покш чакшсо чапакс. Кармить прякат! Совавтозь покш чугуноськак, конасонть сырькаем артни алт, анокстазь чурькалукштнеяк. Каштомось зярс апак ушто, ансяк кудопотмованть уш ливтни кодамо-бути лембе, мельспародонть сельмень конявтыця кошт.

— Сырькай, — пшкадинь, — стык юдминенть?

— Кода эно эзия, — чевтестэ талакадсь сон ды ютась икелькс кудов.

Тосто лиссь мазый юдмине марто. Истямонть сон стакшны тень казнекс эрьва ие. Ванды карман путнеме тов ламбамкайть ды алт!

Шкась ансяк-ансяк токась чокшненть малав. Ялатеке шкастонзо стямга эряви мадемс ней. Саинь мартон вишкинька пувтыця част, налост ладинь «кавтонтень». Ансяк а удовомс, кода мелят! Бути монсь а стяван, сырькаем жалясамам, а карми пувтамон. Ды сестэ кемемась Тёмань лангс: саты набойчизэ — пувтасамам, бути сырькаем мери… Арась! Ансяк а удомс шканть, марямс частнэнь цийниця вайгелест!

Кузинь каштомлангс, ваннан чувтонь кудоверьгаксонть. Венстян кедем ды вадяшан тюжа валаня лазтнэнь. Превень налксезевсть. Кодат ансяк артовкст а муят морготнень ды чувтодонть седе чопода суркстнэнь ютксто: нумолот, ведьвенчть, ломанень рунгот ды чамат…

…Сыргозинь. Удалце кудосонть чоподась аламодо валдомтозь ожосо. Толось кирвазтезь ансяк каштомикеле. Маряви, кода сырькаем боты тевсэ: калдордыть чакшт-вакант, маряви мезень-бути ведень кондямонь сэтьме шольнема. Прякань пидемадонть кудопотмось псилгадсь, чинесь куцти судонть…

Седеень токнозь ванан частнэнь лангс… Инешкипаз! Тейть, инескеть, истя — шкась улевель аволь пек ламо. Мельспаросо таргия оймем: шказо ансяк кемгавтово част! Ней а удома. Бути матедеват — пушкасояк а стявтоват.

Ёзмолдозевинь, сэрей тодовтнень, эчке ацамотнень лангсо вития рунгом. Неян, кода сырькаем лиссь паникудосто, нардынзе кедензэ икельга пацясо, озась пазава ало аштиця стуворонть экшс. Ваны кияксонть лангс, турванзо лыкить, сокарить кодат-бути арсемат. Содан, сырькаем сизесь. Покштянь кодат тевензэ? Тия-тува урядамс кудовальмалксонть, ёртомс кудыкельксэнь кияксонть лангс ацамот. Ней сон нувси икелькс кудосо. Сырькаем яла боты тевсэ.

— Вай, корьмакай… — кувакасто лекстясь сырькаем ды, каштлангсо чарамом марязь, кепедизе прянзо. — Удок, нуцькинем. Мезть стомат?

— Сырькай, — мон велявтынь пеке лангс ды эвкстыя мокшнам улом алов, — ёвтнек мезеяк.

— Мезе тонеть ёвтнемс? — сон таго нардынзе кедензэ. — Удок, пиштякине.

— Сырькай, — а кадан эйсэнзэ, — тон якилить алонь пурнамо?

— Коли эно! — ушоды сырькаем, ды мон содан, мезде сон карми ёвтнеме, ялатеке мельспаросо кунсолан. Сырькаень валонзо истя эсь таркаваст арыть пельсчопода, прякань танстьсэ пештязь кудосонть, маряви — седе вадря монень а карми зярдояк.

— Минек шкане алт эзть пурна, — поладсь сырькаем. — Бути ансяк эсь буень-раськень ломань максы. Косто сынь саемальть, алтнэ? Беряньстэ эринек, пельсвачодо. Мейле уш, зярдо войнась прядовсь, аламонь-аламонь кода-бути аравтовсь те коеськак.

— Кармиде вадрясто эрямо? — кецязь кевкстия мон, теке содыя содамоёвксонь каршо валонть.

— Неень шканть ваксс а путови, нуцькинем. Конфеткат-мезть эзть ульне. Те ней вана — эрьва мезть. Тонь иесэ истяттнэнь онстонгак эзинь некшне.

— А авам ды крёстной тетям якасть алонь пурнамо? — таго кевкстия мон.

— Неть якасть. Истямо охальникень тевс весть совсесть — те шкас а стувтови.

— Кодамо тевс?

— Кодамо… Совасть Гирянь Матрянень. Тона самай венелев лисекшнесь. Ваныть — ал марто паргинесь стувор лангсо ашти. Ды чамдызь пелевидьс, антихристтнэ! Кода аздан превест сатотсть зяро-бути кадомс.

— Ды мезе?

— Мурнинь, нама. Кшнань каркссо риштинь, — ды сырькаем кувакасто таргизе оймензэ. — Удок эно.

Ансяк а удан. Валгинь каштлангсто ды ютынь икелькс кудов. Тосо, нолдазь телевизоронть икеле, нувси покштям. А мезень тейнемадо сельмень сеске нединь телевизоронтень. Ванан, кода озномань покш кудосо юты служба. Весемесь валдо, цитни сырнесэ-ашосо. Ознома кудось тыц пешксе. Ломантне каштмолезь аштить штатолнэ марто, сэтьметь, вановтост валанят… Мон вестькак эзинь ульне церьковасо. Велесэнек сон арасель, ды кода мон чарькодекшнинь, Пазонтеньгак тесэ кияк пек эзь кеме. Улема, колмо сырькайнетнеде башка, конатне эрясть лавка удало кудынесэнть ды якасть кулозтнень моравтомо. Сынст мекс-бути лемдекшнесть манашкакс.

Мейле ледстявсь: весть лавкасто некшния шабра велень «батюшкантькак». Сонзэ ульнесь «Минск» мотоциклазо. Вана весемесь, мезе марто монь вишкинька ойминем аштесь Пазонть цёранзо вельмемань чинть икеле.

…Клянцькадсь кудыкелькс кенкшень кшнинь чарынькаесь. Марязевсть совицянь эскелькст, ды зярдо мон лисинь удалце кудов, икелень уш аштесь Тёма. Чамазо сэтьме, тевень содыця.

— Христос воскрес, — састо мерсь Тёма, ды вайгелезэ ёмась пельсчопода кудонть потс.

— Воистину воскрес! — содавиксстэ пандызе сырькаем, макссь Тёманень ал ды конфеткат.

Мон карминь оршнеме.

— Ванодо, састо, — мерсь сырькаем, зярдо кавто кедьсэ нежедсь вальмалангонтень ды варштызе ушонть ёжонзо. — Кодамо чопода! — ды эзь кирдеве: — Мезть якатадо пелеветь, теке цыгант. Учовлинк эно куш валдомгадоманть.

Сырькаем путсь юдмазон ал, чанстимим, ды минь Тёма марто чатьмонезь лисинек.

Ушось лексесь шождыне летькесэ, тештень валдосо. Минь аштинек кузтемпесэ, зярс сельменек эзть тонадо чоподантень, ды сыргинек видьстэ те чоподанть потс.

Ушось вадря. Канзёркссо почодозь модась чикорды пильгенек ало, эйсэ таргавозь ведьпурнавкстнэ гайгить синдтревкссэ. Ды сэтьмечи весе куротнень келес… Ансяк кискань вайгельтне тия-тува ноцковтнить коштонть.

Истямокс минь некшнинек веленть иезэнзэ весть. Инечистэ. Клубов зярс эзинек яка, ды велень куринкатнева пелеветь молемась ульнесь минек туртов алкуксонь казнекс. Марявсь, весемесь перьканок: кудотне, чувтотне, пирявкстнэ — алтазть ансяк минек туртов. Ськамозонок.

— Ушодтано Алопестэ, — мерсь Тёма. — Мейле велявттано мекев, чамдсынек юдманок ды мольтяно Верепев.

— Вадря, — ёвтазесь тусь мелезэнь. — Паряк, Парков ды Од Курос кенертяно пачкодеме.

— Эно! — аволь пек гайтевстэ рангстась Тёма. — Иля пеле, монь марто те тевсэнть а ёмат!

Васенцекс совинек Дарька бабанень. Сон эри ськамонзо велепес сэтьместэ озавтозь чувтонь кудынесэ.

Чоподань пачк пильгенек эль мукшныть кузтемань лазтнэнь. Тёма ноцковтызе кенкшенть, ды минь окойники совинек кудос. Толось палы ансяк каштомикеле.

— Христос воскрес!

— Воистину воскрес, — каятотсь каштомикельде, ды тосто лиссь Дарька баба. Чатьмонезь эвкстась тенек алт, конфеткат, ды минь лисинек.

— Вантакая, а уды! — тешкстызе Тёма уш кудыкельде лисемстэ.

Дарька бабань шабратнень — Барантнэнь — кенкшест пекстазь, кудосонть тол а неяви. Тёма васня вачкоесь кедьсэ, мейле пстидизе кенкшенть пильгесэяк. А куш а каш. Минь велявтынек пирявксонть ёнов, ды Тёма апак учо недясь раужо ганкас. Тонась, ушонть келес сёторгадозь, сивсь. Кудосонть кирвазсь тол, ды минь чиезь напустинек куринкаванть. Лоткинек ансяк колмошка кудонь ютазь.

— Кода чиинек, а? — мизолды Тёма.

— Вадрясто, — аволдынь прясон.

Сыргинек седе тов. Кода вадря совсемс эрьва кудос ды ваномс, кие кода эри. Каня несыть велень весе кудопотмотнень кодамояк лия чистэ?

Тевенек сыргась, чаразевсь-велязевсь. Эрьва кудонть эсензэ чинезэ, ёжозо. Эрьва кудосонть од чамат. Кадык содавиксткак.

Юдманок аламонь-аламонь пешкедсть. Алтнэнь марто весе макснесть тенек конфеткат. Лабань кудосо, конань икеле уш исень чистэ саезь аштесь питней иномарка, кодамо-бути асодавикс цёра натой макссь тенек «Сникерст». Сэвинек сынст сеске, эль кенеринек лисеме кудостонть.

Куншкакуров пачкодинек, зярдо уш паро ладсо валдомгадсь. Каршонок понгсть Настя ды Миша. Сынь тонавтнесть монь марто. Бути уш педе-пес видестэ кортамс, минь весемезэ колмонек ульнинек котоце классонть.

— Те тынь истя косто? — талакадсь Настя.

— Алопестэ уш, — мерсь Тёма.

— Эге! — кундась Мишаяк. — Аволь исяк уш тосто ушодыде?

— А эряви кувать удомс! — покшкавтнезь меринь мон, ды минь явинек.

Ней уш минек кондят пурныцятне секе-тев понгонить каршонок. Минь весень содасынек. Весе тонавтнетяно чувтонь таштыне школасонть…

Кудов пачкодезь, чамдынек юдманок. Тёма ливтсь тень ал, конфеткат, ды сыргинек Верепев.

Ней уш весемесь: артозь ды апак арто киякстнэ, дерматинсэ ды ташто коцтсо чавозь кенкштне, кафельсэ ды штукатуркасо мазылгавтозь каштомотне, ломанень мизолдыця чаматне, кевкстематне, зяро пурнынек алт ды косто ютатано, — кармась човорявомо. Ансяк мезеяк истямо, кода Варань Петянь кудосо, кадовкшнось пряпотс.

Минь содынек: Варань Петя ульнесь реведе понав симагаекс. Эрясь ськамонзо ды симсь. Кодат пельдензэ конфеткат? Ансяк Тёмань туртов сон сави лелякс, ды тунь а совсемс тензэ а ён.

Кудопотмозо аламодо тандавтни: ловтаня-рудазов тюст, стувор, эземне — ды весе. Петя костояк а неяви, секс Тёма серьгедсь:

— Стяк, Петя леляй! Христос воскрес!

Кие-бути кармась сокарямо каштомлангсо. Васня неязевсь Петя лелянть пондакш прязо, мейле, кода-бути сеске, каштомлангс кузема лазонтень чалгасть кавто пильгеть.

— Тон, племяш? — сорнозь кевкстсь Петя.

— Мон, леляй. Валера марто.

— Ужодо, цёрат, ужодо, — таргизе оймензэ Петя ды нолажтсь кияксос. Ютась каштомикелев, кармась калдордомо кодамо-бути чакшсо.

— Мезе тосто вешнят? Исень чинть? — эзь кирдеве Тёма.

— Ужодо, цёрат, ужодо, — Петянь вайгелезэ сорны аонкставиця визьксчинь коволдонть.

— А эряви мезеяк! — аволдась кедьсэнзэ Тёма. — Сыргатано!

— Ужодо, цёрат, ужодо, — таго ботнозевсь Петя. — Кода эно, Инечи…

Ды моненьгак теевсь визькс…

Петя окойники ливтсь тенек кавто ашо алт, ды минь лисинек.

— Алтнэ апак пидеяк! — мерсь Тёма ашинькаенть прянзо вакссо сорновтозь. — Ну арты фильмат лелям! — ды ёртызе алонть пирявксонть ёнов.

Истямо сон, Тёма, мезе мартонзо теят. Мон састыне нежедия эсь ашо алом ганкатнень юткс. Инечи!

…Ды Битерень Зоянь кудосо неезеськак кадовсь превс. Совинек, кудосонть — тейтерь ды цёра. Цёрась стувор экшсэ озадо сими кшнинь кедьгинестэ пиядо. Сонсь Зоя мезть-бути боты каштомикеле.

— Мезть, ялгинеть, Пазонть ней ледстнить ансяк алонь пурнамсто? — мизолдозь пшкадсь цёрась минек ёнов, зярс Зоя пурнась алт ды конфеткат.

Минь чатьмонтяно. А содатано, мезе меремс…

— Иля чаракавто эйкакштнень превест. Сыненст те а эряви, — чевтестэ мерсь цёранть вакссо аштиця тейтересь ды озась кумажанзо лангс.

Сынь кармасть апак визде палсеме. Минь айгинек вановтонок веёнов. Мейле саинек Зоянь кедьстэ алтнэнь, конфеткатнень ды стамбаркине, талакадозь лисинек ушов.

— Владик, — тевень содазь ушодсь Тёма, зярдо минь уш молинек куринкаванть, — университетсэ тонавтни. Аламо сонзэ школасо равтсть. Те шкас ки соды мезть лаборды!

— А тейтересь? — кевкстинь.

— Нама, алужозо, — эзь пупордя Тёма.

Ушось лембелгадсь, чипаесь невтизе чаманзо, минь яла эскелятано велеванть, теке азорт. А мезень тейнемадо онкстнетяно чудикерькстнэнь сэрест, кецязь ваннотано пертьпельга. Кодамо вадрякс марявить велень куротне! Улить кеме кудот, рацяня чувтот, раужо киксэкс ёртнезь, трактортнэнь чарытнесэ изазь кить. Тунь аволь берянь, бути ваномс апак пеле ды кандомс лавтовонь трокс каязь Инечинь казнесэ пештязь юдминенть.

…Кудов сынек, велень весе кудотнень ютазь, кемень чассо. Тесэ кажось муимимгак. Эцинь кувака ведьлушмонтень ды, пильгетнень апак кепсе, карминь ютамо икелев. Ванынь, кода чопода веденть сэрезэ айгшеви кемем ало, ожо лугинетне лымбакстнить потмаксонть лангсо. Ды апак учо нолаштынь, чопавтинь ве кементень кельме ведь. Савсь чиезь напустямс кудов. Истя — а фатяволь сырькаесь — каямс начко носканть ды вешнемс лия. Бульчом, эзинь талакадояк. Зярдояк эзь ютакшно Инечистэ алонь пурнамось кажовтомо. Мелят кискась сезинзе понксом, ульнесь седикеле — пракшнынь рудазс… Те, нама, секс — эзинь яка озномань кудов.

Мон састынькине чамдыя юдминем стуворонть лангс ды карминь явномо: алтнэнь — ве ёнов, конфеткатнень — лияв. Сельмень секе-тев снартнесть пекставомо, монь апак кевкстнеяк.

— Кона алтнэ аламодо поркснезь, сетне сэвемат сеске, — тонавты сырькаем, стувор ланга ацазь «ули-паром» онкстазь.

Мон кочкинь ветешка сехте тантей ламбамкайть ды удомань вешиця сиземанть кольневтезь кузинь каштомлангс. Вейке омбоце мельга эвкстнинь конфеткатнень кургозон, ды арсинь: «Мейсэ инесь? Мезеяк эдь эзь тееве…».

— Ламо пурныть алт? — кевкстимим покштям.

— Ламо! — меринь каштансто.

— Ну удок эно, оймсек, — мерсь покштям меельцепелев.

Ды мон — каштомонть лембезэ теке вельтимим чевте кумбосо — видеяк куроксто матедевинь.

Косто ульнесь содамс: пурнынь аволь ансяк ламбакайть-алт. Эзь маряво сестэ — таштынь коволнэть-панкскеть, конат апак учо ушодыть кецявтомон мейле, зярдо уш монсь карман явшеме эйкакштнэнь туртов Инечинь казнеть. Ды мезе те — истямо мельспаро ёжось, конась вельми тундонь тарьксэв валскензэ марто — бути аволь Ине Чи?

Ожо пусмо

Ёвтнема

Сёксь, сёксь, сёксь… Менеленть чамаварчамозо пекставсь потмура тюссо, ушодсть валомо пиземеть. Пертьпельксэсь, истямонть неезь, сеске стувтызе ожонзо, олась ды нусмакадсь.

Кецямс ульнесь а мезть. Ютасть сёксень кизэнь читне, зярдо минь школанек якинек Алопень паксяв якстерькаень ванськавтомо. Сестэ прянок велькссэ чарась ожо лембесэ лексиця коштось, валдо-сэнь менелесь. Якстерькаень певтеме бурттнэ мезекскак эзть марявояк. Тюк! — санов недьксэнть ланга пшти пеельсэ ды чопода-ашо прянть — веёнов. Часонь-кавтонь ютазь налкстат седе пек а ков, ансяк те мезеяк. Муевить лия тевтькак. Кундсек чеерть ды ёртнек сынст тейтертнень лангс, керсек якстерькайтнень лангсо эрьва кодат тамашань артовкст, кеверькшнек пря велькска недьксэнь кумбованть. Весе неть «тевтнень», чарькодеви, эрязкинестэ кородокшность тонавтыцятне, ды минь таго ойсилинек буртонть перька. Пейдезь лавгинек эсь юткованок, ледстнинек эрьва кодат тамашань тевть. Истя ютакшностькак минек шожда читне…

Ней — сорны кудовальмало касыця штапо килеесь, теке сакалов палмань, ды тандадозь ашти ожо лугась.

Лисинь кудосто ды сыргинь школав. Пиземетне меельце кавто-колмо читнестэ потасть, пертьпельксэсь аламодо соркстась. Менелесь ялатеке кадовсь потмуракс, пансесь тей-тов чопода пельть, теке мерят сюворясь мокшнат ды анокстась моданть марто тюреме. Тонась сэтьмель. Мейсэяк уш а тандавтсак. Учось васень якшамотнень, теленть. Мезе сонензэ пиземесь?

Велекуротне чавольть ды каштмольсть. Вейкеяк ломань эзь понго тень, зярс ютынь школанть видьс. Ды се — онгозевсь косо-бути киска, чикордозевсь тона куринкасонть лисьмапрянь чарынькаесь — марявсь ки соды кодамо тевтеемакс, малав тамашакс.

Школанть вакссо вастыя Тёмань. Сон апак капша ёрвалдсь кемензэ апокшке ведьлушминесэ.

— Юрьевна повасамам течи, — васенце тевекс яволявтсь Тёма. — Таго стувтынь валтнэнь тонавтнемс…

— Ды ну? — ансяк кадновськак меремс тень.

— Куш ну, куш гну, — поладсь Тёма. — Авам исяк понксон муськинзе сынст марто вейсэ, — ды лекстясь, теке кемевтсь — видеяк мелявты. — Пижнеме кармить, куш Аловелев чийть.

Тувталт сонензэ а кемемс ульнесть аволь вельть ламо. Валтнэнь Тёма «ёмавтынзе» уш колмоцеде.

Школасо, кода свалгак сёксень оймсема таргодонть икеле, анокставсь «Сёксень бал». Эрьва тонавтницянтень максозельть нурькине валморынеть сценариенть коряс, конатне лемдевстькак валокс. Тёма, саемга, ульнесь тумонь лопакс, мон — пангокс. Весемесь эно мезеяк, ансяк «Сёксень балонть» чизэ — уш ванды.

— Яла, чей, эриекс кадоват, — меринь мон.

— Куш каникулатне седе курок ушодовольть! — седейшкава пстидизе ожо луганть Тёма.

Ды видеяк, курок — вандыде мейле, ушодовить оймсема чить! Ловт, олячисэ пештязь эрямо! Ды те шожда арсеманть кундазь, минь сыргинек школанть ёнов.

Чувтонь школась, косо тонавтнинек, аштесь Куншкакуронь сехте келей таркасонть. Пирявксокс эрьва ёндо сонзэ куродсть сэрей укшторт ды акациянь куракшт, прявт совамонь тарканть икеле — килейть.

Школантень ютамга эряви васняяк печтямс лазсто теезь теине сэдненть, кона ёртозь лемтеме чудикерькскенть трокс. Тунда ведесь сыргакшны сэдненть лангаяк, валови мик школань кузтемпенть видьс. Арась мелеть молемс школав — нолдык пильгеть сэдненть лангсто алов, кеметь потс ведь совазо, ды весе: тон «ваить» — эряви велявтомс кудов. Зярс тов, зярс мекев… Истя ютыяк васенце урокось. Бути а пелят кельме ведте.

Минь ютынек сэденть ланга ды совинек школанть пирявксонзо потс. Сонсь школась аштесь «п» буквакс, ды «п» -нть кувака кикстнэ, зярдо ютат совамо кенкшенть ёнов, ваныть видьстэ лангозот, анокстыть, теке мультфильмасо, нилеметь, бути эзик тее кудов максозенть.

— Тёма ноцковтызе стака кенкшенть, ды совинек. Карминек кайсеме.

— Кудосто панидизь? — кевксть Нюра урядыцысь, зярдо неимизь.

Школась зярс чаволь. Ансяк васоло нупальстэ кайсететсть ушодкс классо тонавтницятнень цильниця вайгелест. Валскестэ саезь а содыть оймамо, озить, зярс школасонть «азорт» ансяк сынь.

Полавтынек котанок ды сыргинек классонок ёнов. Монь — сисемецесь — ды Тёмань — кавксоцесь — аштесть шабрацек.

Чаволь классомгак. Мартон тонавтницятне — Настя ды Миша — зярс эзть са. Миша сэредсь, эзь сакшно школав уш колмошка чить, ды, нама, а сы течияк. Таргсинь тонавтнемапельтнень ды варштыя классонть. Ансяк мезть тесэ ваномс? Весемесь содавикс, куш сельметькак конить. Кенкшенть маласо ужосонть — голландканть раужо пекезэ, покш тюжа лазось минек колмо стувортнэнь каршо. Лазонть велькссэ — сакалов физиктнень портретэст… Ды кавто вальмат, конат ваныть школань пиренть ёнов. Варштат — мезеяк паро ладсо а неявияк — а кудот, а килангова ардыця тракторт. Ансяк раужо мода ды акациянь куракшт.

Ули, виде, мезесь сеске а редявияк. Ансяк ялатеке содат, косо ды мезе. Саемга, удалце стенасонть, физикань формулатнень ало, сёрмадозь вишкине буквасо: «Валера + Настя» ды артозь седейне. Кода эзинь снартне — эзь нардтневе. Ки соды мейсэ сёрмадызь. Улема, вельть вадря фломастерсэ. Эли классонь ужинесэ Мишань фотографиязо. Сеске а содавияк — сон тосо Гитлерэнь муюк марто.

Лисинь коридорс. Тесэяк секесь — содасак эрьва киякслазонть. Ды ялатеке мельспаро якамс, кунсоломс, кода сынь чикордыть чаво коридоронть келес.

Те ней школасо тонавтницятнеде мик колоньгемендеяк аламо. Седикеле, тонавтыцятнень валост коряс, пачкодекшнесь колмосядоскак, тонавтнесть кавто сменасо. Кода сынь весе кельгекшнесть школантень — кевкстемась минек туртов ульнесь аизнявиця. Нейгак вана чийнят-чийнят коридорганть, ялатеке эшкеват кинь мартояк конядо-коняс.

Ды мезе? Кадык эно колоньгемень. Мезеяк лангс апак вано, тесэ эрясь башка мастор, конань чарькодьсы ансяк се, кие сонськак тонавтнесь велень вишка школасо. Эсь мелявкст ды койть, кенярксчить ды налксемат.

Тонавтыцятне кортасть, курок минек школанть пекстасызь ды карматано якамо Аловелев. Нама, мезеяк — молемась аволь пек васов, ансяк ялатеке нусманя. Колхозонь прявтось таштамковонь линейкасонть истя мерськак: «Зярс эри школась, карми эрямо минек велесь». Те мезе, лисни, зярдо пекстасызь школанть, веленек кулы?! Ломантне ды кудотне ёмить, теке эзть ульнеяк? Веленть куншкас стявтыть чувтонь покш крёст?.. Кодаяк эзь чарькодеве, кода те лиси.

Ютынь а мезень теемадо чаво коридорганть ды стинь «Школьная жизнь» стендэнть каршо. Кувака, мик весе стенанть келес стендэсь пештязель эрьва кодамо фотографиясо. Конатне ансяк ашо-раужот, конатне — тюсовткак.

Эрьванть ульнесь эсь лемезэ ды тешкстазель иесь, зярдо теезь.

Вана, саемга, натой ожолгадсь, кодамо ташто: «1956 ие. Чукалонь сисем иень школань тонавтыцятне». Аштить кавто рядсо. Цёратне — стядо, аватне — озадо эземлангсо. Чаматне сэтьметь, мизолксонь пелькскеяк косояк а неяви… Вана: «1972 ие. Школань пиресэ». Тонавтницятне пурныть модамарть, мизолдозь ваныть видьстэ снимицянть лангс. Удалост неявить модас пезнавтозь койметь, пештязь кескавт… «1983 ие. Таштамковонь васенце чи». Аштить школанть икеле тонавтницятне, а лововитькак зяронест. Ды уш а чарькодевияк — кие мизолды, кие арась. Ансяк редявить цецянь пусмотне, конатнень кирдить кедьсэст. «Ды весементь тень — пекстамс?» — талакадозь кевкстнесть фотографиятне. Кодаяк эзть кеме — истя алкукскак карми. Мейле мольсть тюсовткак, мазыйть ды цитницят, косо уш миньгак ультяно. Ансяк ков седе малавгадсь шкась — тов седе аламолгадсть эрьванть лангсо снимазтне.

Совинь мекев классос, карминь анокстамо урокс. Шкань ютазь ушодсь чикордомо школань совамо кенкшесь, коридорось кармась пештявомо вайгельсэ. Ушодовсь тонавтнема чись.

Васенце урокось ульнесь литература. Зярдо классонтень совась Альбина Васильевна, стинек партанок экшстэ, мартонзо шумбракстнемга, ансяк кавонек: мон ды Настя. Миша, кода арсинекак, течи эзь са.

— Шумбрачи! — нолдась эряза мизолкске Альбина Васильевна ды ютась эсь стуворонзо ваксс. — Озадо!

Альбина Васильевна ульнесь сехте од тонавтыцякс, кона важодсь минек школасо. Ды мик кавто ёндо. Васенцесь — эсензэ иензэ ансяк аламошкадо сыргакшность комсенть велькска. Омбоцесь — сон кармась школасонок важодеме таштамковсто саезь. Седикеле литературанть ветясь Любовь Дмитриевна. Алкине, ашо прячерь марто сэтьме сырькайне. Уроконь перть сон кавксть эли колмоксть ёмавтнесь сельмукшонзо, ды теке марто тонавтома книгасонть арасель вейкеяк валморо, конань Любовь Дмитриевна а содавлизе педе-пес. Меельце шкане сон кармась сеедьстэ сэрелеме, ды тарказонзо сась Альбина Васильевна. Васня минь талакадынек, эзинек кемеяк — сон тонавтыця. Варштамс веёндо — теке тейтерька, куш озавтык кавксоце классос парта экшс.

Настя уш чинь ютазь исковизе весе эрявиксэнть Альбина Васильевнань коряс: ансяк прядызе институтонть, Варань Наталень кодамо-бути васолдонь буйраськень ломань. Сонзэ кедьсэ карми эрямояк. Рамась исяк лавкасо колмо ламбамо эйнеть: кавто ашот ды вейке шоколад марто.

Альбина Васильевнань васенце уроконзо мельга минь школанек ладинек: карматано вечкемензэ. Шкань ютазь те мелесь седеяк пек кемекставсь.

Альбина Васильевна зярдояк эзь пижне, эзь путне кавтот (мезень кисэ, минь содынек, сонзэ мурнесь директорось), свал ламо мизолдсь ды пеедькшнесь минек марто. Бути кевкстят — ёвтни эрьва мезде: кода сонсь тонавтнесь школасо, мекс Пушкин эзь сае дуэльс граната, зярдо эряви тонавтнемс валморот — чокшне эли валске… Истямонть кисэ минь эзинек озя уроксонзо, кунсолынек ды топавтынек весементь, мезе тенек мерекшнесь. Мик Тёма, кона кода уш эзь элякале школасо, зяро, Светлана Юрьевнань валонзо коряс, потясь тонавтыцянь верь, сеяк Альбина Васильевнань уроксо аштесь сэтьместэ.

Эрявсь сёрмадомс сочинения «Сырнень сёксь» теманть коряс. Кода ды мезде — Альбина Васильевна ладсизе покш мазый тешкссэ сёрмадома лазонть лангсо. Кода полавтось пертьпельксэсь, мекс сёксенть лемдить сырненькс, мезть теить велень эрицятне ды седе тов. Ансяк Настя ялатеке эзь чарькоде, мезде ёвтнемс, ды порнесь сёрмадомапелензэ. Эрьва сочинениясь сонзэ туртов ульнесь теке аволь валт сёрмадомс — кандтнемс пондошкань сталмосо кевть. Мон уш кенеринь ладсеме кеменьшка рисьметь, зярдо Настя велявтсь ёнон.

— Кода ушодомс? — тошказевсь сон.

Мон талакадынь истямо кевкстемадонть ды ялатеке меринь сэтьместэ, теке а мезень тейнемадо:

— Прядовсь кизэсь. Сась сёксесь. Чувтотне ожолгадсть.

Настя кенярдозевсь, теке мон казинь сонензэ тёжа целковойть, ды ушодсь сёрмадомо. Ансяк а кувать.

— А содан, мезе сёрмадомс… — аймельгадозь мерсь Настя.

— А содат? — чевтестэ мизолдозевсь Альбина Васильевна. — Сестэ варштак вальмас ды сёрмадт, мезе неят.

Настя, видеяк, велявтызе прянзо вальманть ёнов. Ушосонть — секесь: потмура, потмура, потмура. Марявсь, коштоськак чополгадсь. Ды Настя кадовсь аштеме теке потмура мельсэнть:

— Почо видьс рудазонть ланга?

— Мекс сеске рудазонть ланга? — талакадсь Альбина Васильевна. — Сёксесь — те аволь ансяк рудаз ды пиземеть.

— Мезе эно? — кевкстсь Настя.

Альбина Васильевна стясь ды ютась вальманть ваксс. Арсесь аламошкас ды кортазевсь апак капша, теке путнесь эрьва валонть стуворлангс:

— Сёксесь — те ожо пусмо. Лопань каштордома ды вармань вайгельть. Шка, зярдо эряви кунсоломс пизементь ды ледстнемс кизэнть. Эжнемс лембе кудосо, зярдо ушосо якшамгадсь… — ды таго арсезевсь.

«Ледстни кизэнть», — сеске чарькодинь мон.

— Ну, сёрмадт лазонть лангсо максозь лувонть коряс, — поладсь Альбина Васильевна, теке сыргозсь. — Таргиде кудосо модамарть?

— Таргинек, — мерсь Настя.

— Теде сёрмадткак. Сёксня велесэ пек ламо тевтнеде. Эряви урядамс пиретнень, таргамс модамарть, якстерькайть…

— Сёрмадомс, зяро ведрат таргинек? — кевкстсь Настя.

— Сёрмадык, — мизолдозевсь Альбина Васильевна.

Монь эсь сочинениясонть кармась увтямо веёнов. Сёрмадынь, кода налксинек «войнушкасо» пирепесэ, тейнинек модамарень недькстнэнь эйстэ кекшнема таркат, ёртнинек умарть, теке гранатат. Кода полавтнинек модамарть арбуз лангс, кода якинек пангос Аловелень килеень васоло кужонтень, пурнынек килангсо якстерькайть, конатне пракшность КАМАЗ-тнэнь кузовсто… Эль кенеринь прядомо уроконть пес, ды ялатеке вельть ламо кадовсь, мезде эзинь ёвтне.

— Алкуксонь роман, — пейдезь тешкстызе Альбина Васильевна, зярдо мон максыя тензэ тетрадем.

Гайгезевсь баягинесь, ды Альбина Васильевна лиссь.

Оймсема пельксэнть шкасто минек классос совась Тёма. Сельгень прамс сон арсесь ёроков налксема: сайсак лазонь нардтнема нулыненть ды ёртнят сонзэ верев, снартнят понгомо видьстэ ашо плафононтень. Шождасто лисевель, бути аволь Настя. Сон чийнесь мельганок ды чавсь эйсэнек кутьмере ланга. Ансяк Тёма ялатеке понгсь. Плафонось эрязасто нурязевсь тей-тов, анокстась сезевеме ды прамо. «Кирдть, японской городовой!» — рангстась Тёма ды кедензэ венстезь напустясь плафононть алов, автень кургот кармась ваномо верев. Плафонось нурясь-нурясь ды оймась. Миньгак шождасто лекстинек.

Омбоце урокось ульнесь алгебра, конань ветясь сонсь директорось — Светлана Юрьевна. А меремс, сон кежей, ансяк бути мезе эзить тее, эзить чарькоде — аштек, ялгине, урокто мейле куш пелевес, зярс весементь а топавтсак.

Светлана Юрьевна макссь конёвлангсо сёрмадозь примерт, ды минь карминек сынст тееме. Тесэ уш сась шка моненьгак порнемс сёрмадомапеленть. Икстнэ ды игриктне вансть лангозон, теке ятт, конатне зярдояк а изнявить. Кекшнесть скобкатнень потс, эцекшнесть ков мелест. Мезть тейнемс сынст марто — паро ладсо эзь чарькодевкшне. Настянень жо мезеяк — чулгсесь сынст, теке чиньжарамонь видьметь. Сёрмадсь истя эрязасто, карминь пелеме — кирвази тетрадезэ.

Секе-тев савкшнось нерьгстнемс Настянь кутьмерес, теевель мезеяк моненьгак. Тень сеске редизе Светлана Юрьевна.

— Кармат истя налксеме — кадтан урокто мейле, — мерсь кеме вайгельсэ. — Арсек эсь прясо.

Карминь, мезеяк а теят, арсеме. Ды тесэ, тунь апак учо, теке идемапель, тетрадьсэ сёрмадозь икстнэнь ды игриктнень лангс прась чипаень валдо.

— Вантака, манейгадсь! — талакадозь каинзе сельмукшонзо Светлана Юрьевна, мольсь вальманть ваксс. — Чипаеськак лиссь… Кие арсевель…

Ушонть ёжозо полавтовсь. Теевсь валдо ды вадря. Истямо кенярксчи валовсь пертьпельксэнть келес — школань пиресэнть акациянь куракштне, сетнеяк кармасть аштеме теке каштансто, сэрей штатолнэкс. Секесь чипаенть валдонзо марто вейсэ совась минек классонтеньгак. Мик алгебраськак аламошкас стувтовсь.

Ды зярдо минь максынек тетраденек тонавтыцянтень, сон (икеле истямось зярдояк эзь эрсе) эзинзе варштаяк. Мон шождасто лекстинь. Кода эзинь «арсе», изнявсь тень ансяк вейке примерэсь.

Светлана Юрьевна сёрмадсь лазлангс од формула ды кармась ёвтнеме, кода сонзэ марто важодемс. Мейле вакссозонзо лиссь Настя, ды ушодсь сёрмадомо секе формуланть коряс. Мон ансяк кандыть секеть тешкстнэнь мельганзо тетрадьс. Истя, чипаенть валдонзо марто вейсэ, ютаськак урокось.

Оймсема пельксэсь ютась сэтьместэ. Дельнинек кенкшудало, ванынек, кода Тёма ды Юля (сынст классост течи дежурясь) снартнесть оймавтомо вишка тонавтницятнень. Тёма алтакшнось: бути а лоткить чийнемеде пекстасынзе шкапс. Тувталт сонензэ а кемемс таго арасельть — истямо «тонавтоманть» сон уш топавтокшнызе ютазь таргосто. Эйкакштне сеске лоткасть элякалемеде ды нардазь нардавсть эсь классокаст.

Мейле ульнесь география. Ды таго важодема — муемс картанть лангсто весе лейтнень, конатне ушодовить «М» буквастонть. Мон муинь кавто: Миссисипи ды Мурей. Настя мекс-бути арсесь, Мельбурнонь ды Марселесь истя жо лововить леекс. Те эно мезеяк. Аволь вельть покш кажось. Зярдо урокось пачкодсь куншкавидьс, кармась марявомо, кода вачомсь пекесь. Монь — мик урнозевськак. Ды теке шкане качадозевсь ярсамо нупаленть ёндо пидезь модамарень чине. Кодат уш тесэ географият, Мурейть ды Марсельть!

Эль учовсь баягиненть вайгелезэ, ды сыргинек ярсамо.

«Станем мастерами полей и ферм!» — сёрмадозель покшсто ярсамо нупаленть весе стенанзо келес. Ды артозельть кавто важодицят: цёра ды ава. Цёрась кирдсь кедьсэнзэ вачкоемапель, авась — тарваз. Минь, виде, ванынек сынст лангс ды эзинек сода, кикс карматано. Ансяк ярсынек. Течи макссть томбазь модамарть ды салтозь куярт, костязь умарень компот. Тамашань тевть! Кудосо истямонтень пенчетькак а навасак, кода налкставсь. Школасо те маряви ки соды кодамо тантей ярсамопелекс, ды ярсат, теке космонавт.

Ансяк лисинек ярсамо нупальстэнть, каршонок понгсь Павел Юрьевич. Сон яволявтсь вадрядояк вадря куля: трудонь ды физкультурань уроксто карматано анокстамо коридоронть «Сёксень балонтень», кандтнеме школань пирестэ лопат. Трудонь уроктне ютакшность кавксоце классонть марто, ды минь сельгень прамс весе вейсэ ювкстынек ушов. Ванынек, кода ды мезе ней тосо ладявсь.

Чипаесь валсь ожонзо теке кизна, ансяк пертьпельксэсь уш эзь кеме истямонтень, кадовкшнось аштеме экшестэ, судрявкшнось якшамо варминесэ. Миненек кенярксонь пачк те мезекскак эзь марявояк. Ялатеке — маней чи, ды минь аволь классо! Чийнинек кузтематнень-турниктнеть юткова ды налксинек «толсо». Сасат киньгак ды ускат шапканзо сельмензэ лангс, мезеяк а неевель. «Пандт толонть кисэ!» — эряви меремс те шкане ды чиезь напустямс веёнов. Бути кенерят.

Зярс истя налксинек псилгадомазонок, эзь редявояк, кода малазонок сась Павел Юрьевич.

— Ярь эно, саты налксемс, теке вишка эйкакшт, — мерсь сон аймельгадозь. — Адядо пирев.

Ды минь сыргинек Павел Юрьевич мельга.

— Кодамо кежев, — пейдезь тошказевсь пилезэнь Настя. — Улема, похмелиясо.

Свал сон мезть понги лаборды! Эрьвась соды: Павел Юрьевич а сими. Зярдо ушодовить Мастянь пелькстамотне — а муеви маласо весе велетнесэ цёра, кона кепедевлизе гирянть сондензэ ламоксть. Служаськак сон, кортасть, косо-бути спецназсо. Ансяк Настянень те мезеяк. Неизе Павел Юрьевичень кода-бути кизна иредезекс, ды весе — ней сон Настянь туртов свал «похмелиясо». Азё вана цидярдт неть тейтертнень каршо!

Павел Юрьевич ливтсь мастерскойстэ чаво кескавт, сянгот, ды молинек школань пирепес, сэрей укштортнэнь рунгост алов. Тевенек мольсть вадрясто. Васня пурнынек укшторонь лопатнень покш марс, мейле Настя ды Юля кармасть пештеме кескавтнень. Минь Тёма марто кандтнинек сынст школав, чамдтни ды, а неевель Нюра баба, зяро рудаз кандынек, чиезь чиилинек мекев.

Ансяк кенерсь Павел Юрьевич совамо мастерскойс, минь Тёма марто сеске правтынек Юлянь ды Настянь ожо маронть лангс, карминик валямост лопасо. Тейтертне каня пейдсть, каня пижнесть. Эзь чарькодеве. Эзь чарькоде Павел Юрьевичкак.

— Ну мезть, мезть озятадо? — каятотсь удалдонок вайгелезэ.

Минь Тёма марто варштынек вейке-вейкенек лангс ды талакадынек: «Видеяк… Мезть минь озятано? Кода а чарькодемс истямо шожда тевенть — а эряви озямс ды налксемс?».

Мезеяк лангс апак вано, уроконть пес весе коридорось вельтязель каштордыця ожо кумбосо. Минь якинек ланганзо ды пстииник лопатнень, теке оскинеть. Коське лопань чинесь човорявсь чувтонь школанть потмокоштонзо марто, ды марявсь, лексят лопань оймеде. Ушосо, куш вирь потс совак, истямось зярдояк а маряволь. Вадрясто ладявсь, а мезть кортамскак!

Омбоце урокстонть минь тейнинек лопатнестэ мазый понгавтнемкат. Настя ды Юля сюлмсесть лопинетнень вейкес-вейкес суресэ, минь Тёма марто, стуворлангсо аштезь, педявтнинек сынст потолокс. Те шкастонть Светлана Юрьевна куродымизьгак.

— Коридоронть мазылгавтынк вадрясто, — ушодсь сон. — Ансяк косо сёксень пусмонк? Весе лия класстнэ умок теизь. Ансяк тынь кадовиде. Тееде куш кавто классонь пельде вейке.

Те вана тев! Чарат-велят чинь перть, ды ялатеке мезеяк стувтови. Весемеде башка, эрьва классонтень эрявсь анокстамс сёксень пусмо. «Сёксень балсо» сынст вансынзе тонавтыцянь жюрись ды кочкасы сехте вадрянть. Казнетне — эрьва кодат сёрмадомапельть ды альбомт, шнамонь конёвт — максовить весенень. Ансяк ялатеке, мезть иля корта, — вадря, зярдо классонь ужинесэнть понгавтозь васенце тарканть кис арневкс.

Видеяк, весе лия класстнэнь пусмотне уш аштесть коридорс ливтезь стувор лангсо. Ансяк минь кадовинек.

— Тейсынек! — савсь меремс тенек.

Ды уш зярдо прядовсть уроктне, прядовсь «Сёксень балонтень» анокстамось, пурнавинек минек классо, карминек арсеме, кода изнямс те тевенть.

— Садо школадо мейле монень, тосо тейсынекак! — мерсь Юля. — Пурнатано умарьпирестэ лопат ды мезеяк арсетяно.

— А мезе? — апак учо кецязевсь Тёма. — Вадря! Тевесь лиси!

Истя ладинекак. Ды сыргинек кудов.

Монь аламодо талакавтымим Тёмань энтузиазмазо сёксень пусмонть анокстамонзо кувалт. Ды уш зярдо ансяк кавонек ютынек курованть, Тёма окойники панжинзе алкуксонь арсеманзо:

— Ды паловоль те пусмось тоначисэ! Тон мезе, а содат — Юлянь кудосо ули «Сега»? Кадык тейтертне котьмить пусмонть марто, минь — карматано налксеме! Мон уш весементь ладсия икелепелев: Юлянь тетянзо-аванзо кармить фермасо, Сашка лелязо сы техникумсто ансяк чокшне малав. «Сегась» — минек! — меельцьпелев мик рангстась Тёма.

Кадовсь ансяк талакалемс Тёмань превензэ кувалма. Кода эрязасто арсизе! Карматано налксеме «Сегасо»! Конинек сельменек, ды уш марявсь, кода кирдтяно кедьсэнек раужо джойстиктнень.

* * *

Кудосо мон полавтынь школань оршамопелень, эрязынестэ ярсынь ды сыргинь Тёманень.

Сон уш учось эйсэнь вальмало, калгсесь дураккуяронь видьметь. Ёроковсто ёртнесь ашинькайтнень кургос ды гайтевстэ сельгенесь икелев, теке снартнесь кинь-бути ледемс.

Тёма каванимим моньгак, ды, ашинькайтнень чулгсезь, минь сыргинек курованть. Эзинек редяяк — менелесь таго потмургадсь. «Артынек», ков сатокшность арсеманок, кода карматано налксеме «Сегасо».

Мейле вастовинек Настя марто. Сон самай лисекшнесь пирепестэ Куншкакуров. Ёжозо ульнесь тунь аволь истямо тёкшсо, кода минектне.

— Стяконь тевть весе неть пусмотне! — апаркстомозь кортазевсь Настя. — Тынь неинк, кодамо пусмо тейсь вейксэце классось? Азё ней икельдить, пурнак седе вадря! Васенце таркась сынст, куш кавтов лазовт. Ансяк шкань ёмавтнема! Якак ней вана рудазга, пек эряви. Мишанок вана кудосо ашти, сими чайде ды ваны телевизор.

Минь чатьмонинек. Чарькодеви, Миша ашти кудосо. Тень марто вейсэ — кодаяк а понги сонензэ «Сегань» джойстикесь. Истямо уцяскась — ансяк минек туртов. Ды сеяк — кодат Настянь тевензэ? Аштемс кудосо, ваномс «Дикий ангел» сериалонть ды педявтнемс башка тетрадьс Наталья Орейро марто артовкскеть? Пейдемань тевть!

Юля эрясь Алопесэ. Зярдо пачкодинек кудост видьс, Тёма вачкодсь кенкшентень.

Шкань ютазь лиссь Юля, карсинзе калошанзо ды ветимизь умарьпирев.

Юлямезень умарьпиресь ульнесь пек покш. Парсте ладямс — сехте покш минек велесэ. Мезе ансяк тосо эзь касо! Умаринань кувака курось аштесь куншкасо. Сонзэ перька, эрьва кодамо лувсо ёртнезь, — атямарть, шукшторовт, овтоумарькст, пизёлкст ды лия ки соды кодат куракшкеть-касовкст.

Пурнынек кескавс эрьва кодамо тюсонь-покшолмань лопат, тарадкеть-марть ды совавтынек кудос. Ацынек ули-паронок киякска ды карминек арсеме, мейстэ ушодомс. Васень тевекс Юля совавтсь покш дураккуяр, ды минь керинек сонзэ кавтов, ванськавтынек потмонзо. Те карми минек пусмонть чакшозо. Седе тов уш кадык тейтертне арсить, мезе ды кода.

— Налксетяно «Сегасо»? — келянь-мелянь апак якавто кевкстсь Тёма.

Соды, ёжовкаесь, косо эряви гуекс тапарямс, косо — теке танк — ансяк икелев.

— Сашка карми сёвномо, — мерсь Юля.

Ансяк ёвтызе тень истя, теке сонськак чарькодсь: ней уш, ды Тёмань каршо, удалов а потат.

— Ды минь акувать. Сон содамояк а карми, — мендясь састынькине Тёма.

— Ну… — арсезевсь Юля. — Аламошкас налкседе.

— Ага! — ацирьгадсь Настя. — Сынь — налксеме, минь — важодеме.

— Ды лезэсь сынст пельде, — аволдась кедьсэнзэ Юля. — Куш пильге ало дельнеме а кармить.

Меельцесь марявкшнось уш кутьмеренек удало. Минь те шкане ульнинек икельце кудосо, нолдынек телевизоронть. Ладинек уськетнень, седеенекак эль эзть лотка.

Важоди!!!

Муинек «Мортал Комбат» налкшкенть, ды сыргась якстересэ цитниця псись! Плаштинетне киштсть суронок ало, теке гармониясо сединек. Марявсь, телевизоронь тюсов суликанть лангсто валовить лангозонок инедеяк ине тамашат. Налкшкень откертне кирнявтнесть, чаравтсть сальтот ды эрьва кодат кульбитт, мезе ульнесть виест лупсовасть вейкень-вейкень.

Васня изницякс седе сеедьстэ лисекшнесь Тёма. Ансяк мейле мон полавтыя откеренть, «саинь» чопода черь марто тейтерь, ды Тёмань откересь секе-тев кармась пургсеме верьсэ, вийтеме пракшномо масторов. Мейле Тёмаяк полавтызе откерензэ, ды изнязекс таго карминь лиснеме мон.

Эзь редявояк, кодо ушосонть чопотетсь. Юля секе-тев энялдсь лоткавтомс телевизоронть, ансяк минь теке эзинек маряяк. Ды сестэ сон нолдызе тевс меельце идемапелензэ.

— Сы вана Сашка — невти тенк! — мерсь Юля.

Тесэ уш минь сыргозинек. Лоткавтынек телевизоронть ды нусмакадозь лисинек удалце кудов. Сурозонок мик пуворькст теевсть.

Зярс минь налксинек, тейтертне пурнызь пусмонть. Сон каштансто аштесь стуворлангсо, теке апокшке кузнэ Од иеде икеле. Липнесь ожо лопасонзо ды ванкшнось кудопотмонть. Ванынек сонзэ лангс миньгак.

«Сёксь 2004» — ладсезель дураккуяронть пекензэ лангсо пизёлксонь якстере марнестэ. Укшторонь покш лопатне каштазокс куродсть чакшонь петнень, куншкасо аштесь, теке удось, ашо умарне ды пизёлксонь пусминеть.

— А мезе? Монень вечкеви, — ёвтызе мелензэ Тёма. — Мазый!

— Шожда ды ванькс, — поладынь мон. — Алкуксонь сёксень пусмо. Аволь кода вейксэце классонть — ки соды мезть эвкстнезь…

— Эно улевель лиякс! — мерсь Настя. — Эно варчавлиде меремс — а вечкеви!

Тень марто прядынекак пусмонть марто тевенек. Ды озынек чайде симеме. Юля кандсь стуворлангс покш шумбракши, раужо шукшторовсто пидезь ламбамкай, лакавтозь ведь марто чайник. Ламбамкаенть ваднинек чевте кшинть ланга, учинек, зярдо чопода-якстересь сови ашонть потс. Истя марявкшнось — теке ярстано тортонь палнэде.

Апак учо каятотсть совицянь эскелькст, кенкшесь панжовсь, ды кудонтень совась Юлянь лелязо — Сашка.

— Я! — эрязкинестэ варштась лангозонок сон. — Ды тесэ минек турслёт!

Ёртызе каштлангс чаво юдминензэ, конань свал кандтнесь мартонзо, марят, тонавтни ды тосо улить тетрадть, каинзе котанзо, понгавтызе кедень раужо куртканзо. Свал сявадокшность сельменек, Сашкань лангс ванозь. Весемесь сонзэ теке алкуксонь алюхань! Ули «Сегазо», кедень куртказо, мотоциклазо — аволь кодамояк «Минск» эли «Восход», мик «Ява». Ков иля сельге — свал икеле!

— Пурнатано сёксень пусмо, — мерсь Настя.

— Искусства тейтядо? — мизолдозь ваннызе пусмонть Сашка, мольсь минек ваксс, лепштнинзе кеденек. — Искусства — те вадря! — яволявтсь меельцьпелев ды капшазь совась икельцькудов.

Чарькодеви, тевть: эряви урядамс кардазсо ды уш пурнама Аловелень клубов. Ансяк Сашка аламо шкань ютазь лиссь мекев ды таго кортазевсь пейдезь, мик ёвксонь валсо:

— Кие нолдакшнызе монь покш телевизоронть? Кие налксесь монь покш «Сегасонть»?

Мейле кундызе Тёмань прянзо кавалалов, кармась ёзамо черензэ кедьлапушкасо. Виде, Тёма куроксто менсь, ды Сашка поладсь, кежень апак кирде:

— Ярь эно, молекулат, адядо налксетяно. Сашка лелясь тонавттадызь, кода эряви.

Ансяк джойстиктнеде ульнесть кавто, ды Тёма, кода эзинь веше, налксемс монень эзь максне. Эль эзинек тюрьгадо. Вадря, Сашка явимизь. Мон покордавинь, кижнэзь арсинь Тёманень «повавомс те «Сегасонть» ды лисинь удалцькудов.

Тосо самай Настяяк пурнакшнось кудов, ды минь сыргинек мартонзо вейсэ.

Чокшнень пертьпельксэсь паро ладсо почодозель чоподасо, ды зярс сельменек истямонтень эзть тонадо, молинек састо, маринек, кода пильгенек ало матрави ожо лугась. Ансяк зярдо лисинек Алопень вейкине палыця фонаренть алов, ёжонок кепететсь, сыргинек седе эрязасто. Ойминьгак уш, кода амызыйстэ тейсь Тёма, зярдо ськамонзо налксесь «Сегасо» Сашка марто…

Зярдо пачкодинек Элька бабань кудонзо видьс, мештезэнь таго кармась новолеме мезе-бути талновтыця. Ды чарькодеви! Эрьвась соды — Элька баба чокшнеланга орожии. Варшты лангозот вальмава, ды весе: велявттанзат лягаекс эли кискакс. Паня Васька ёвтнесь, весть валскес велеванть чийнесь кискань рунгос… Азё ней ютак Элька бабань вакска, истямонть содазь…

— Валера… — тошказевсь Настя. — Элька баба ваны лангозонок!

Велявтыя прям вальматнень ёнов, ансяк эзинь чарькодеяк, ваны-арась мельганок Элька баба. Истя жо эзинь чарькоде, кие эйстэнек васенцекс напустясь чиезь.

Лоткинек ансяк сядошка эскельксэнь онкстазь. Ды апак учо рединек: чииник мекс-бути кедьте кундазь. Эзь чарькодевшне кавонек туртов: мень те тамаша, тейтерентень ды цёрантень велекурова ютамсто, кирдема кедте? Настя эрязасто ноцковтызе кедензэ ды стакасто лексезь кортазевсь:

— Арсят, вансь?

— Аздан, — меринь мон. — Нама, эзь, бути те шкас ломантяно.

Ды минь пейдезевинек. А мезе? Пелемс ды пейдемс — кавонест валтнэ ушодовить вейкетьстэ. Мезть талакалемс, якитькак малацек.

Явинек Настя марто, зярдо сонензэ эрявкшнось пирепева валгомс кудов, ды сыргинь чаво куринкаванть ськамон.

«Вансь! — згилязь ладсинь эсь пачкан — свал вана Настя ки соды мезть лаборды. Кунсолок!»

Ансяк онгозевсь верьгизэнь апаро лувсо киска косо-бути удало, ды ладия: кадован удомо сырькаень кедьс. Мезть кельмсемс сёксень ушосонть, зярдо сырькаень кудозо тунь аволь васоло? Нама, течи прякаткак пансь. Нолдасынек телевизоронть, лакавттано чай… Ды весемесь карми, кода Альбина Васильевна кортаськак.

* * *

«Сёксень балонть» чистэ урокт арасельть. Сынек школав уш чикуншкадо мейле, карминек анокстамо кенярксчинтень. Школань коридорось сельгень прамс велявтсь коткудавонь кудынекс. Минь, тонавтницятне, ливтнинек классто озамо таркат, эземнеть-стуворт. Ков ды кода сынст аравтнемс — невтнесть тонавтыцятне. Сынст вайгелест вачкоевкшнесть вейкес-вейкес, човорявкшность киякслангсо лопатнень каштордомаст марто, эцекшнесть минек пейдеманть юткс. А кода ульнесь идевемс те лакиця ведьвелявксонть эйстэ.

— Всё смешалось в доме Облонских! — пейдезь мерсь Альбина Васильевна, истямонть лангс ванозь.

Покш чинть тешкстамозо ушодовсь лувонть коряс. Кинень эрявсь, лиснесть икелев ды кармасть мельга-мельцек валморонь ловномо. Ваныцякс кадновсть тонавтыцятне ды ушодкс школань эйкакштне.

Тёма, кадык исяк алтакшноськак тонавтнемс валтнэнь, куш модамасторонть лангсо теевезэ «светопредставления», мезеяк эзь тонавтне ды кадовсь ваныцякс. Ансяк пейдсь монь «пангонь» якстере пряспутомам лангсо, зярдо ёвтнинь валмором, ды невтнесь, суронзо менчезь, эрьва кодат амазый тевть. Куш вана ледик, ёжов антистулонть!

Зярдо весе те прядовсь, валморонь ловныцятнень таркас лиссь Светлана Юрьевна ды кармась кортамо сёксень пусмотнень пелькстамонть коряс. Ушодсь, кода ладияк истямо тевсэнть, веёндо.

— Вечкевикс тонавтницят! — мерсь сон. — Минь ваннынек весе пусмотнень! Весе сынь марявсть пек мазыекс ды вадрякс! Ды пек стака ульнесь кочкамс сехте вадрянть! Ялатеке, кода а улевель, снартнинек киньгак а покордамс…

Мон озадолинь Настянь вакссо ды пельсельминесэ рединь, кода сон састынькине мизолдсь Светлана Юрьевнань валонзо пингстэ, теке мерят эзь кеме марязентень.

Васенце тарканть максызь вейксэце классонтень. Мейле мольсь котоце классось. Мельганзо — ветецесь. Ды ансяк мейле — минь: сисемецесь ды кавксоцесь. «Приз зрительских симпатий», — яволявтсь Светлана Юрьевна. Ловт, меельце тарка…

Минь Тёма марто мезеяк: саинек кискине марто фотоальбомтнень ды карминек ваномо, зяро тосо лопат. Настя ды Юля аламодо нусмакадсть.

— А монень тынк пусмось вечкевсь весемеде пек! — мерсь тейтертнень туртов Альбина Васильевна. — Алкуксонь сёксень тюст: ансяк ожо ды якстере.

— Ага, — састо кортазевсь Настя, зярдо Альбина Васильевна тусь аламодо веёнов. — Ожо ды якстере! Ды меельце тарканть максызь!

Мейле ушодовсь чайде симема. Зярыя партасто пурназель кувака стувор, сонзэ лангс кармасть путнеме эрьва кодат ламбамкайть: прякат-паневкст, конфеткат — кие мезе кандсь кудосто. Мон, саемга, кандынь ламбамо паневкст-тештинеть. Настя — якстере потмо марто пряникть. Яказевсть стуворонть кувалт кшнинь покш чайниктне, таго кепедевсь шалт. Истямонть кувалмо — ней эзть мелявто мик тонавтыцятнеяк. Симсть чайде ды пейдсть минек марто вейсэ, мик талакадынек: сынь, тонавтыцятне, содыть аволь ансяк веень урокт — маштыть теке ялгат кортнеме минек марто. Кие арсевель: Тёма карми ёвтнеме Светлана Юрьевнанень, кода ардтнесь тетянзо марто КАМАЗ-со, ды весть мик рулентькак кирдсь. Меельцесь, нама, манчема, ансяк ялатеке. Марявсь, тонавтыцятне ды тонавтницятне мейсэяк а явовитькак, бути сакшныть школав вейсэ.

Шкась уш ютась сундерькс ёнов, зярдо карминек пурнамо кудов. Школастонть минь лисинек колмонек: мон, Настя ды Тёма. Апак капша сыргинек Куншкакурованть, пейдезь кортнинек теде-тонадо, ладсинек-цётынек, мезть карматано тейнеме оймсема читнестэ.

Элька бабань кудонзо видьсэ сасынек Альбина Васильевнань. Сон эскелясь яннэванть апак капша, кедьсэнзэ кандсь укшторонь зярыя лопат.

— Тыньгак пурныде сёксень пусмине? — мизолдозь пшкадсь Настя Альбина Васильевнанень. — Мезекс сон тыненк эряви?

— Кода мезекс? — талакадсь Альбина Васильевна. — Путса вальмалангс ды тельня карман ледстнеме сёксенть.

— Телес лопатне наксадыть, — ёроковсто ладясь Тёма.

— А наксадыть, — мизолдозевсь Альбина Васильевна. — Берянь ансяк, а вельмить одс, а теевить пижекс.

Нама, истя ульнеськак. Мейле, тельня, истя жо апак учо, кода сась, Альбина Васильевна тусь минек велестэнть.

Ды ялатеке эзь чарькодеве, кода те истя: сёксня ледстнемс кизэнть, тельня-сёксенть. Мезекс?

Зярдо весе срадсть кудост ёнов, мон кадовинь ськамон. Апак капша ютынь чаво куринкаванть ды ванынь пертьпельга, теке мезе-бути вешнинь. Марявкшнось чокшненть летькинезэ, менеленть пиземес анокстыця ёжозо. Сёксь! Мезеяк сонзэ марто а теят. Соды эсензэнть.

Мон арсинь ды снартнинь чарькодемс, мекс Настя ды Юля истя нусмакадсть сёксень пусмонть коряс. Кадык меельце тарка. Ды мезе? Арази те кажо? Ушодовсть оймсема чить! Ютыть сынь, аламошка тонавтнетяно — ды вана уш телеськак, Од иесь. Школасо стявтыть кузнэ, кармить макснеме ламбамкай марто кескавнеть. Мейле сы тундось. Карми… Ды каня аламо мезе карми, мезесь тестэ, сёксень сундерькстнэнь пачк, зярс а неявияк…

* * *

Шка, шка, шка… Чийть, моразь, икелев. А карман мелявтомо: ламо иеть ютасть се шкастонть, зярдо ульнинь тонавтницякс. Ялатеке сёксня, зярдо певерить ожо лопатне, кольнить варматне ды валыть пиземетне, эрси (свал талакалинь, кодамо асодавикс-анеявикс китнева сакшныть ледстнематне), апак учо стякшны икелень весемесь: чувтонь школась, тонавтыцятне, эйкакшпингень ялгатне. Ды мизолдан эсь пачкан: тунь аволь стяко минь пурнынек ожо пусмотнень.

Ды бути тыньгак, тень ловнозь, ледстинк тиринь веленк, эйкакшонь шканк — тунь аволь стяко сёрмадыя ёвтнеманть. Стяко, снартнян кемеме, а эрси мезеяк.

Гайтев кизэ

Ёвтнемат

Кизна, кадык эринекак райцентрасо, каникулатнень ютавтомо мон сынь велев, покштянь-сырькаень туртов. Ёртыя каштлангс рюкзаком ды эсь пачкан сынь кеме мельс: вана сон, кизэсь, кундык, иляк менстя. Ды марявкшнось — истят учомань ёжотне манчеме а кармить.

Шкась ульнесь сырнень. Аштекшнесь косо-бути куншкавидьсэ: каня эйкакшат, каня од ломанят. Чаравтт ков мелеть!

Велесь кизэнь перть лакась од ломантнень эйстэ, конатне сакшность каникулас. Тесэ ульнесь алкуксонь олячи. Сырькайтне-покштятне вансть вечкевикс инжетнень мельга ялатеке аволь истя пштистэ, кода тетятне-аватне. Якак ушова ашолгадомас, удок зяро мелеть. Казнесь, зярдо теть кемготово иеть, седе покш а ков. Текень кисэ, мезть уш сёпомс, туинь велев монгак.

Васняяк велень кизэсь ушодовсь ачарькодевиксстэ. Весе од ломантне явшезельть кавто кувтава: «веленсетне», кить велесэ эрястькак, ды ошсто сазтне. Велень ялгатне, кинь марто вейсэ тонавтнинек школасо, тусть эйстэнь ков-бути веёнов. Некшнинь сынст, ансяк зярдо чуродо-весть сакшнынь велев. Ошонсетнестэ овсе аламо кинь содылинь. Кадовинь косо-бути куншкавидьсэ ды эзинь сода, кода ней кирдемс прянть.

Ансяк тейнемс ульнесь а мезть. Чокшне, зярдо неия клубонь вальминетнесэ толонть, оршия джинсовкам ды лисинь ушов. Тесэ ютамскак зяро, сырькаень кудонзо эйстэ — ансяк трокс печтик кепедезь кинть ды уш аштят клубонть икеле. Истя теиньгак.

Стинь, а понговоль лангозон толось, аламодо веёнов ды кундсинь кузтемпестэ марявиця вайгельтнень. Удалон марявсь ютыця. Мон велявтынь ды неия Тёмань. Мартонзо вейсэ тонавтнинек велень школасонть.

— Я, те тон, некак, шабра, — талакадозь мерсь Тёма, зярдо пачкодсь монь ваксс. — Мезть тесэ аштят? Адя совак, иля пеле! Кие токатанзат, ансяк мерть — калмасынек, модапотсто а лисеви! — ды шождынестэ тулкадимим икелев.

Кепедевинек кузтемпес. Мон Тёмань мельга лепштнинь цёратнень кедест ды совинь клубс. Вить ёно, стуворонть экшсэ, налксесть картасо. Шумбракстнинь сынст мартояк, кочкинь стенатнень кувалт аштиця креслынетнень эйстэ чаво ды озынь. Гримёрканть ёндо шкань-шкань кайсететсть цёраломанень гайтев вайгельть, ракамонь-пейдемань шалтт. Сценанть лангсо аштесь таштыне музыкальной центра, чаравтсь кодат-бути морот. Ансяк кияк эзь киште. Тейтертне ды цёратне озадольть креслынетнева, кортнесть-тейсть эсь ютковаст. Марявсь, тесэ юты кодамо-бути башка эрямо, кона зярдояк а сайсамам чарамо мартонзо велув.

Ваксозон озась Митрясонь Дима. Аламодо содылия те цёракаенть. Эрясь Саранскойсэ, сакшнось сырькаензэ туртов. Кудост аштесь видьстэ школанть каршо.

— Да-а-а-а, — ушодсь Дима. — Истя тесэ куштамскак а кувать. — Ды апак учо поладсь: — Адя валске марто калс.

— Адя, — меринь мон. — Ансяк ульман арасть.

— Те мезеяк, монь улить.

— Сестэ адя. А ков мольтяно?

— Чеев. Тосо, кортыть, токши.

— Адя, — таго меринь мон.

— Ну, сестэ сован кисэть валске марто, — мерсь Дима меельце пелев.

Ды мон таго меринь «адя».

Кемгавтово малава клубонть пекстызь, ды мон састынькинестэ менинь кудов. Каткакс ювкстынь икельце кудос ды мадинь. Клубонть ёндо кувать марясть пейдемат, эрьва кодамо тюссо артозь вайгельть ды цильнемат. Истя, сынст кунсолозь, матедевиньгак.

Пувтымим тунь лия гайтесь. Мон панжинь сельмень ды кодаяк эзинь чарькоде, мейсэ тевесь. Ушованть ацавсь ашолгадыця валске, марявсь чарьмодевезь атякштнень морамост. Окойники кудовальмалдо каятотсь гайтев вешкема.

Мон стинь ды ютынь вальманть ёнов. Пирявксонть вакссо аштесь Митряс. Кутьмерезэнзэ понгавтозель рюкзак, конань эйстэ ведьвенчень мачтакс вансть верев телескопической кавто ульмат.

Мон оршнинь ды лисинь ушов.

— Ну тон мезе? Удат? — пейдезь вастымим Митряс.

— Мон арсинь, тон а сат, — меринь, сельмень ёзазь.

— Кода истя а сан? — аймельгадсь Митряс. — Исяк кортынек…

Ды минь сыргинек Чей сёлтонть ёнов. Те — кавтошка вайгельпеть Аловелев ветиця кевень кинть ланга. Зярс молинек, пейдезь човсинек теде-тонадо. Мон аволь пек вечкилинь ошонсетнень. Весе сынь марявкшность кодамо-бути ёжовкаекс. Ансяк Митрясонь марто минь сельгень прамс муинек эрявикс пикскетнень. Ды зярдо истятнэ венстевсть минек юткова, мельспаросо сынст ноцковтнинек. Мон кортынь «вейке», Митряс уш ладякшнызе «кавтонть». Ды мекевлангт.

Зярдо пачкодинек сёлтонть видьс, витинек ульманок ды карминек учомо токшеманть. Марявсь, кода калтнэ кирнявтнить чиретнень кувалт касыця куракштнень потсо, чавить пулосост веденть ланга. Ансяк ярсамо тантей суксто сынь мекс-бути эзть капша.

— Ярь эно, садо тей, антистулт, — пейдезь кортась Митряс ды ёртнесь ведентень ашо кшинь паморькст.

Те, нама, калтнэнь туртов седеяк пек эзь вечкеве. Ульмаповтне икеле ладсо сэтьместэ дельнесть веденть лангсо. А куш а каш. Паряк, токшемань шкаськак менстязель. Ведесь уш лоткакшнось лексеме сувсо, кармась невтеме прянзо чипаесь.

Минь нусмакадынек. Аштинек пельчасошка ды карминек ульманок пурнамо.

— Чейсэ токши! Ансяк кенерть таргсеме! — нарьгинзе кинь-бути валонзо Митряс. — Кедемгак уш сизесь калтнэнь усксеме, кода токши.

Ды минь чавонь кедть, таго пейдезь ды раксезь, сыргинек кудов.

Истя, мерят чаво таркасто, ушодовсь минек алкуксонь, гайтев тевсэ ды ёжосо пештязь кизэсь.

Лейть ды паксят

Кизна велень куротне лажныть тевсэ уш валскестэ саезь. Васня сувонть пачк паразевить скалтнэ, кармить «леднеме» стадань ваныцятнень локшост. Мейле ушодови тикшень ледема шкась, певтеме сокакикстнэнь марто пиретнень кочкамось, кардазонь-кудонь лия тевтне. Чопавтат — а лисеват.

Миненек Митрясонь марто тень кувалт майсемс а мезть. Сырькаенек кирдсть ансяк сеинеть, пиринест ульнесть апокшкеть, ды кие соды кодамо важодемань тевть лангозонок зярдояк эзть пракшно. Чинь-чоп минь вешнинек, кода ютавтомс шканть чокшненть самонзо видьс. Ды свал мукшнынек.

Ушодынек сеньстэ — якинек веленть весе пертьпельксэнзэ, а кадоволь мик вейкеяк берякшкине таркине, косо а улевлинек.

Истя, кодаяк а ледстяви, кинь ботол прянтень сась те арсемась, сыргинек вешнеме, косто ушодови чудеме Вежня леесь. Бути варштамс картанть — те таркась косо-бути Козловканть маласо. Мейле сэнь пулынесь чуди минек веленть ёнов, Куншкакуронь пирепетнень удалга ды Алопень килеень кужонть песэ валови Нуяс. Ансяк картась мезе? Миненек эрявкшнось весементь неемс эсенек сельмесэ.

— Зяро ютама картанть коряс? — кевкстсь Митряс.

— Ну, кеветеешка вайгельпеть косояк, — ловинь мон кода маштынь.

Минь арсезевинек. Псись аштесь — карвотне коштсонть солакшность. Ансяк ялатеке сыргинек.

Валгинек Вежнянтень Митрясонь пирепева, ды экспедициянок ушодовсь. Вежнясь — леесь апокшке, кизна — мерят чудикерькске. Тень лангс апак вано, кавонест чирензэ каштансто сэрейть, а тандавтовить кодамояк чадыведьсэ.

Васня весемесь ульнесь содавикс: чиретнень кувалт куракштне ды кальтне, домка таркатне, леенть трокс ёртозь лазнэтне, конат «важодекшнесть» сэдекс пандопрясо Умарьпирентень ютамга.

Мейле, зярдо пачкодинек велепес, Вежнясь лиссь олячис. Куракшт ды чувтот чиретнесэ понгонесть чуросто. Ансяк паксянь луганарось кавто ёнга куродсь лейненть. Полавтовсь чудемань лувозояк: рунгозо келейгадсь, кармась тия-тува менчевеме.

Штапо, куракштомо таркатнева молезь, псись марявсь седеяк пек. Ансяк минь судонок ялатеке кирдинек верьга. Ютынек ды, кода свалгак, ладсинек эрьва кодат морынеть. Ульнесь истямо вечкевикс налксеманок, зярдо молилинек ковгак васов.

«Исяк чокшне Дёготь Марянь

Конязонзо карасть варя! — ушодсь Митряс, ды мон арсинь, кода поладомс.

«Кевкстни Маря: «Мезекс тозонь?».

Тензэ кортыть: «Симемс поза!», — варсадинь мон, ды цирькунтнэ калиця псинть пачк цяпасть вайгелест апак жаля.

Минек шкинемасонть те морынесь лиятнень коряс сехте чевтине. Весе лиятне, кадык ульнестькак «на злобу дня» (кие салась сырькаензэ кедьстэ ярмакт, ардтнесь кардазонь келес туво лангсо, кундась шабра велесэ сельмезэнзэ мокшна…), чаравтсть эсь потсост веень алгапонксонь валт.

Апак учо икеленек штавтовсь таркине, косо лисевель экшелямскак. Келей ды, цётамонок коряс, мештевидьс домкачи марто. Минь гигакстнезь, апак кайсе эцинек ведьс ды карминек вейке-вейкень ваявтомо. Митряс сеске лемдизе те налксеманть «Вьетнамокс». Таркатнесэ, косо ведесь токакшнось кумажас, минь бороцинек раужо илэнть лангсо, кеверькшнинек тусто сандейтнень потсо. Митряс ульнесь мондень ков седе кеме ды весть эль эзимим лепиявто.

Мейле карминек кирнявтнеме ведьс седе сэрей чирестэнть. «Вьетнам!» — пижнинек минь, зярдо саекшнинек чиемань виенть, ливтинек ведентень. Ды… пезнакшнынек потмаксонтень кумажа видьс.

Истя элякалинек пельчасошка.

— Саты эно налксемс, теке эйкакшт! — мерсь Митряс. — Ине тевтне а учить!

Аламошка оймсинек ды сыргинек седе тов. Чикуншканть малав пачкодинек уш Козловканть видьс. Таго чиретнень кувалт сыргасть куракштне, леесь кармась велявтомо ков-бути веёнов, ансяк ине тевесь — Вежнянть ушодксозо — те шкас эзь неявкшно. Минь аноколинек сельгемс весементь лангс ды велявтомс мекев.

— Картась манчи, — ладизе Митряс, зярдо уш ютынек Козловканть.

— Адя уш, мезть ней…

Леенть чирева ней понгонесть ансяк сэрей чейть. Ютамс сынст пачка ульнесь вельть берянь, ды минь саинек яннэнек аламодо верьга. Сонсь леенть чудикерькскесь мик эзь неявояк. Ансяк марявсь, кода чольдерди косо-бути луганть потсо.

Мейле икеленек стясь вакска кодаяк аютавиця куракшонь вирь. Савсь керязь керямс пачкаст ки, ваткамс кедть-пильгеть.

Зярдо куракштне прядовсть, шождасто лекстинек. Икеленек штавтовсь чаво тарка. Косоль ней леесь, татаргак эзь чарькодевкшне. Ансяк авасоло таго неязевсь чеень кужине. Молинек сонзэ ваксс.

Чеень усиянть куншкасо неявсь ведь. Видьстэ модапотсто чавсь лисьмаприне.

— Сон? — кецязевсь Митряс. — Сон! Лия таркасто ведентень саевемс а косто! Мон свал кортынь: эрьва мезенть ули ушодксозо.

— Ды пезэ, — меринь мон.

Митряс пштистэ варштась лангозон:

— Мекев Нуянть видьс а молян! Иля кевкстнеяк!

Митряс снимизе лисьмапрянть телефонс, ды минь сыргинек Козловканть ёнов. Пачкодинек Чукалов пурдыця киулонть видьс, озынек автобусонь лотксема таркантень. Вийть ды мельть ялго шлёбордомс кудов ульнесть аволь пек ламо. Карминек учомо минек ёнов ардыця машинат, а мезень тейнемадо пстиинек вейке-вейкенень кевнеть, конатнень мукшнынек килангсто. Шкань ютазь ваксозонок лоткась покш ожо Камаз. Минь кецязь кузинек сэрей кабинантень. Ды зярдо ардынек Чукалов, секе-тев ванынек Вежнянть куракшонзо ёнов. Мезеяк эзинек мере ветицянтень, косто ютатано. Чатьмонсь сонгак.

Чокшне, зярдо клубсо Митряс весенень невтнесь снимазь тарканть, тунь кияк эзь кеме — те улияк минек Вежнянть ушодксозо.

— Кодамо-бути наксадо лисьмаприне, — кортасть.

— А тон арсить мезе, тосо Ниагарань ведьпрамо карми? — пейдсь Митряс.

Миненек ульнесь ялатеке. Содынек: арасть модамасторонть лангсо истят картат, конат манясамизь.

* * *

Сехте вадря таркась, кона панжи велень пертьпельксэнть ды мазычинть, кевкстик куш кинь, — Вежнянть тона чиресэ Пандось. Кода эзинь искова, киненьгак эзь ледстяво кодамояк лия лемезэ. Паряк, зярдояк те лемесь арасельгак. Пандо, ды тень лангсо весе.

Весемеде сэрейстэ сон кепедевкшнесь Куншкакуронь ды Алопень куротнень каршо ды мейле, Вежнянть марто вейсэ, пансь рунгонзо Нуянть ёнов.

Пандо лангс минь сеедьстэ якинек мастумарень пурнамо. Колмо — кургос, вейке — кедьгес. Кодаяк эзь чарькодевкшне, мекс кедьгесь кодаяк а пештяви.

Сыргинек а мезень тейнемадо течияк. Ютынек леенть, кузинек Пандонть пряс.

Пандонть прясто неяви весе велесь. Теке моданть элес озавтызь. Неявить кудотне, пиже пусмокс тарныця чувтотне ды куракштне. Вана видьстэ минек каршо — сырькаень кудозо, велень лавкась ды клубось. Варштамс керш ёнов — неяви эрьва ёндо пижесэ копачазь школанть ловтаня латозо. Кавлейканть кудонзо аштить пижеденть олякстомозь. Ансяк вейкине покш рацяня калесь налкси ашолдыця лопасонзо.

Содавить чиреваст викшнезь-стазь чувтотнень коряс сёлттнэяк: Чеесь, Мукорькапенсесь, Сэдьлеесь. Сехте покшонть — Мукорькапенсенть — валдо ведезэяк неяви, цитни пси коштонть пачк.

Неяви, кода чиить веленть удалга, теке суре вельде венстизь, кувака посадкатне: Кавлейкань, Калмазырень, Алопень. Ютковаст — видезь паксят. Ды вере, валдо-сэнь менельсэнть, чарыть вецана ашо пельть. «Ловнат» пертьпельксэнть — ды эскелькскак а тееват, кода кирди мазычись.

Миньгак, истя ванозь, озынек оймсеме луганть лангс.

— Содат… — ушодынь мон икелев ваномодо апак лотксе. — Улить вана паксят, лейть, чувтот… Пуви варминесь, пиди чипаесь. Весе лиясь — истяко, а мезень тейнемадо. Аволь алкуксонь, — окойники муевсть меельце валон.

— Эх! Зярдо лисян пенсияс — сан эрямо велев. Ды кизна эрьва чи карман сакшномо тей, — кортазевсь Митряс, теке эзимим маряяк.

Мон эзинь покордаво. Тесэ, Пандонть прясо, — эрьванть арсеманзо эсензэ.

— Монгак, — ансяк меринь.

— Те вадря. Карматано сакшномо вейке-вейкенень инжекс.

— Панеме ченькс, трямо тулякат, — поладынь мон. — Ды шлямо прянть ансяк кикшоень сапоньсэ.

— Мезекс ченьксэсь? Лавкасо микшневи вадря-паро портвейна. Весе покштятне сонзэ гылсэ симить.

Тень лангсо чапинекак. Ды карминек ярсамо мастумарде. Тантейкатне качадсть ламбамо псисэ, солазь соласть кургонть потсо.

Мейле ладинек кирдемс кинть Умарьпирев. Весе неть портвейнатнень ды кикшоень сапонтнень марто эль эзинь стувто ёвтнемс те таркадонть.

Умарьпиреськак аштесь Пандонть лангсо ды вансь видьстэ велекуншкав, косо ульнесь лавкась, клубось, вельсоветэсь. Озавтозель сон советской шкатнестэ колхозонь вийсэ, ды кувать сонзэ истя лемдстькак — Колхозонь сад.

«Варчак сеть шкатнестэ сеземс умарне! — яла ледстнесь сырькаем. — Ванстыцясь нолдасынзе кискатнень — чият аловпандт Вежнянть ёнов, пильгетнень сталмосткак а маряви!» Мейле колхозось каладсь, ды кадовсь ансяк Умарьпире лемесь.

Умарьпиресь ульнесь вельть покш. Ниле ёндо сонзэ ванстсть сэрей поень путовкст, потмонзо кавтов явшесть морамонь чувтонь куракштне. Умаринатне, а лововитькак зяро эйстэст, озавтнезельть куронь-куронь: антоновкат, кизэнь, грушовкат, медень, телень умарть. Бути парсте содамс садонть — муемс эрявикс умаринанть астака. Понгат васенцеде — ёмат, теке вирьсэ. Куншкакуросто ваномсто сон, умарьпиресь, вирекс марявияк. Азёка чарькодть, кода ёжовсто кекшсть умаринатне пойтнень экшс!

Монь ды Митрясонь эйстэ сынь уш ковгак а кекшевельть. Умарьпиресь умок яксезель оймсемань а содыця минек пильгетнесэ нучк-пачк. Муинек сехте васоло ужосонть касыця медень умаринанть. Пештинек зепенек ламбамо умарнесэ ды лисинек пиренть пес.

Тесэ ушодовкшнось розень паксясь. Сон пансь эсь валдо-ожо кумбанзо Ведя шабра веленть ёнов. Бути варштамс вить пелев, сельметне сеске недить пандопрява озавтнезь кудотнес. Те — Михаловка велинесь. Сон аволь покшке, ашти ансяк кеменьшка кудосто, конатне таргавсть ве куринкас. Неяви килангоськак, конась кузи Михаловкас Чукалонь ферматнень ёндо. Седе тов, вайгельпешка веревпандт, — куракшонь ды чувтонь тусто пижесь. Тесэ зярдо-бути аштесь Дружной велинесь. Ней сонзэ эйстэ кадовсь ансяк вейкине латякарь кудыне, эрицят арасельть.

Чарькодеви, минь пурдынек Дружноеть ёнов. Мезть якамс Михаловкава, косо эрить ломанть ды весемесь тия-тува содавикс? Дружноесь вана — тунь лия тев. Кода те истя — ульнесь-ульнесь велинесь ды ёмась?

Ды уш зярдо мон ёвтнинь Митрясонь туртов Богдан садонть ланга, кавтолдомат од экспедициянок кувалт тунь эзть кадовкшно.

Умонь шкатнестэ Дружноеть таркасо эрясь Богданов помещикесь. Сон, бути уш сокарямс седе товгак, ульнесь Н. П. Огарёвонь буйраськестэ. Тонась (кие соды?), паряк, сакшноськак инжекс Богданов лелянстэнь весть-кавксть.

Кудозо Богдановонь ульнесь чувтонь, кавто этажсо, кардазтнэ-утомтне — а лововитькак. Ды весе те ули-паронть перька кассь вельть покш умарьпире. Кежей-арась ульнесь Богданов помещикесь — а валсо, а конёвсо пачтявкс эзь кадово. Весемеде пек талакавтнесь истямо ёвтнемась: ульнесть, келя, Богдановонь тонавтозь кавто овтынензэ, конатнень марто сон мик экшеляськак умарьпирензэ куншкасо чувозь сёлткесэнть. Тагояк — кие соды?

— Овтынетне — мезе? — седейшкава раказевсь Митряс, зярдо минь керинек кинть Дружноеть ёнов. — Вана улевельтькак крокодилт!

— Иля кортаяк, — пейдезевинь монгак.

— Ды мезе? Ков эно ёмась овтынензэ марто? — кевкстсь Митряс.

Ды мон карминь ёвтнеме, мезе содылинь, седе тов.

Революциянь шкасто помещикесь оргодсь Ратор ошов, косо сонзэ ялатеке кундызь ды ледизь. Кудонзо велень эрицятне калавтнизь чочконь-чочко.

Уш советской шкатнестэ састь тов эрямо ломанть, лемдизь велиненть Дружноекс. Умарьпиресь кадовсь. Ансяк ялатеке кувать эзь цидярдо. Ине войнань якшамо телетнестэ чувтотнень керсизь пенгекс, ды ней Богдановонь умарьпиреденть лемдензэ башка тунь мезеяк эзь кадово.

— Те-е-евть, — арсезевсь Митряс. — А вана Богдановось зярдо оргодсь, эзь кекше козоньгак модапотс сырнеть-ярмашкеть?

— Нама, истя ульнеськак, — ладия мон.

— Вана бу муемс! — кирвазсть Митрясонь сельмензэ. — А мезе? Ансяк улевель кшнинь вешнемапель.

— Кундатано кодаяк те тевентень, — мизолдозь алтынь мон.

Лисинек Калымазанть чирес. Те апокшке лейнесь чудсь Дружноенть малава, кандсь ведензэ Вежняс. Кирнявтозь кирнявтынек тона чирес ды кузинек сэрей луганть пачк Дружнойс.

А аштевель эчке кальтнень удало вейкине кудынезэ, а чарькодевельгак, тесэ зярдо-бути ульнесь веле, эрясть, майсесть ды кецнесть ломанть. Таркань-таркань тикшесь ледезель ды урядазель. Те, нама, сакшность Михаловкасто.

Муевсь тенек Богдановонь сёлтонзо таркаськак. Овтоумарень куракшсо эрьва ёндо кекшезь, аштесь аволь пек домка лушмине. Ведь эйсэнзэ арасель. Ды косо аштесь помещикенть кудозо, кодаяк эзь содаво. Ков иля варшта, веень куракшт ды чувтот.

Минь ютынек Дружноенть ды лисинек Михаловкав молиця кинтень. Кинть кавто ёнга аштесть тикшень паксят. Тикшесь уш ледезель ды пурназель рулонс, конат вачказельть сэрей пирамидакс. Минь кузинек вейкенть лангс ды варштынек паксянть келензэ. Паксясо, бути а пуви вармась ды чипаесь а пиди верьгапрява, вельть вадря. Весе гайттнень, мелявкстнэнь, мик сэнь менельганть уиця пельтнень каршояк паксясь соды эсензэ — аонкставиця сэтьмечинть.

Минь мадинек тикшенть лангс ды карминек суронок пачка ваномо чипаенть лангс. Морасть цирькунт, тикшесь тия-тува пупсесь кутьмеренть. Ансяк минь уш кенеринек саеме паксянть сэтьмечинзэ ды тунь мездеяк эзинек мелявто. Марявсь, аштевлинек истя весе эрямонть перть.

— А мекс вана истя? — кортазевсь Митряс. — Чипаенть эйкакштне свал артыть мизолдыцякс. Сон мезе — зярдояк а эрси нусманякс?

— Аздан, — меринь мон. — Нама, эрси. А велявтат жо мекев школав, а артсак чипаенть нусманя чирь курго марто.

— Истя, — лекстясь Митряс. — Ней уш, зярдо касынек, чипаенть артомскак кода-бути а мезекс.

Истя минь кортнинек тикшень пиже рулонтнэнь лангсо мадезь. Мезде эно кортнемс, зярдо ванат кизэнь пертьпельксэнть лангс, бути аволь мизолдыця чипайденть?

* * *

Чокшне ёнов минь, кува а якавлинек, ялатеке мендякшнынек кудонок пелев. Эрявкшнось ярсамс, анокстамс клубов.

— Мезть лытатадо велеванть, теке цыганюкт? — свал музгордсь сырькаем, зярдо мон сылинь кудов ды васенце тевекс эвкстылинь кургозон суронь эчкелмасо пачалксе. — Аштевлиде кудосо, вановлиде телевизор. Ды клубсояк ки соды мезть тейнетядо… Понгат тон уш ковгак те Митрясонть марто, понгат!

Эзинь сода, мезе ёвтамс валонзо каршо. Ды видеяк — мезе? Ёвтнемс, кода минь налксетяно «Вьетнамсо» ды вантано, кода мизолды чипаесь? Истямось кодаяк а ладяволь.

А мезть пелькстамс ансяк вейкенть каршо: курок минь Митряс марто видеяк ковгак ды понгтано. Ансяк косто сырькаентень содамс: те понгомась эряви минек туртов весемеде пек.

Ашо полон

Курок, васняяк Митрясонь бойкачинзэ вийсэ, минь аламонь-аламонь карминек совамо чокшнень эрямо лувонтеньгак. Митряс свал ламо пеедькшнесь, эрьванть марто мукшнось мезде кортамс ды кода ветямс прянть. Ды бути уш мезе а истя — тюремасояк прянзо а максылизе.

Кияк минек эйс эзь педсе. А зярдо тюрьгадынек клубонь кузтемпесэ Алопенсетнень марто ды Митряс сэньшкавтынзе Батон Сегань кавонест сельмензэ — кортамскак ульнесь а мезть.

Теде мейле минь, зярдо сакшнынек клубов, карминек совсеме гримёркас. Ды те уш, кемеде, тунь аволь стяконь тев. Тосо свал аштесть велень покштне: Маляронь Ромат-Тёмат, Мараень Сашка ды ошонсетне, кить тия-тува невтизь пряст. Истяко, а мезень тейнемадо, а совават тов кодаяк. Пейдтядызь эли вачкить копорь алга.

Кадовкшнось ансяк вейкине эскелькс — молемс Аловелень клубов. Ды весе — тень мельга минь улевлинек алюхакс куш ков.

Зярдо Чукалонь клубось пекставкшнось, гримёркасо аштицятне озакшность мотоциклас ды ардокшность Аловелев. Тосонь клубось важодсь мик пелевес. Ды од ломантькак Аловелесэ ульнесть седе ламо. Мотоциклатнень стоп-толост, конатне липнесть килангонть лангсо, марявсть минек туртов лия масторов ветицякс. Минь, кить кадовкшнынек Чукалсо, срадокшнынек клубонть пекстамонзо марто кие ков. Аштинек автобусонь лотксема таркасонть, чаво кудотнень эземтнева-кузтемпева.

Шкань-шкань гримёркас совавтнесть ченькс марто суликинеть. Цёратне симсть, ёртнесть пей алов пиже чурькат ды умарть. Нуртнесть минек туртовгак. Ансяк ашонть варчамонзо пелинек. Иредтяно, кармить лангсонок пейдеме… Те тевсэнть, кода кортась Митряс, «эряви тренировка».

Ушодынек тунь вишка тевстэ. Пурнынек суликас якстере шукшторовт, каинек ведь, сахар ды оргат. Путынек кардазпряс. Колмо чинь ютазь варчинек. Брагинесь лиссь мезеяк: ламбамо ды, кода ладинек, «удем лангаяк чави вадрясто».

Мейле туинек седе тов. Раминек «Жигулёвской» пия марто покш сулика ды чикуншкане сыргинек Чей сёлтонтень. Истямо тевенть лувозо вельть ёроковоль: бути иредтяно, чокшненть малав прянок ялатеке ванськады ды минь, теке мезеяк эзь ульнеяк, сыргатано кудов.

Зярс ютынек, панжинек суликанть ды весть-кавксть копордынек. Пиясь марявсь сэпеекс. Покш полавкст прянть потсо эзть редявкшно. Ансяк цирькунтнэ кармасть морамо теке седе гайтевстэ.

Пачкодинек Чеенть видьс. Ломанть тосо, тамашань тев, ульнесть аламо. Асодавикс кавто тейтерть, паряк, минек иень, эжнесть рунгост чипаенть каршо. Нама, састь Аловелестэ. Ды колмошка эйкакшт пулькасть тона чиресэ.

Минь кайсинек ды совинек ведьс. Мон уинь сёлтонть куншканзо видьс ды велявтынь мекев. Митряс ансяк чопавтсь-тейсь чиренть маласо, укшнось аламошкас ды лиссь. Зярдо мон кузинь чиренть луганаронзо лангс, Митряс уш мезть-бути човсесь тейтертнень марто. Молинь сынст ваксс монгак.

— О! А те вана ялгам — Валерыч! — мерсь Митряс, монь неезь. — Укшномо вечки — теке ихтиандр. Аздангак, мезе мартонзо теемс. Вийсэ сёлтстонть а таргави.

— Ага, — совинь велувс монгак, — эйкакшпингестэ саезь вечкса Жак-Ив Кустонь «Подводной одиссеянзо».

Тейтертне пейдезевсть. Ней уш сынь кавонест озадольть вельтявксонть лангсо, ды секе-тев мезть-бути мизолгалесть эсь ютковаст. Ансяк а мереват, виздсть. Кавонест марявсть бойкинекс, цивтёрдыцякс. Васенценть лемезэль Света, омбоценть — Карина. Виде, сон энялдсь тензэ пшкалемс Рина. Кортазевинек. Света сась Аловелев каникулас Саранскойстэ. Рина, кургонокак автевсть, — Мурманск ошсто.

— Ды кода тосо? — сеске кевкстия мон.

— Якшамне, — мерсь Рина. — Истят кизэть, кодат тесэ, учнемскак а мезть.

Минь пеедькшнинек мартост аламос, ды Митряс цярадсь:

— Карматадо пиядо?

— А тынк мезе, ули? — кевкстсь Рина.

— Ули, — мерсь Митряс. — Минек эрьва мезенек ули.

— Манчат?! — эзь кеме Светаяк.

Мон кандыя кескавонок ды таргия ули-паронок вельтявксонть лангс. Митряс сеске панжизе вейке суликанть ды копордась.

— Мезе, карматадо? — таго кевкстсь сон.

Тейтертне кавтолдозевсть. Ды Рина ялатеке мерсь, теке истямось — симемс пиядо чикуншкане — сынст туртов свалшкань тев:

— Аламошка варчатано.

Чакшкеть арасельть, ды минь симинек видьстэ суликинестэ.

— Неят, Чукалонсетне пиядо симить, минек каванить, — пейдезь кортазевсь Света. — Минектне ансяк ченькстэ глохтить, теке бегемотт.

— Ну да, минь истят, — мерсь Митряс.

— Аристократт, ловт, — поладынь мон.

Тейтертне аштесть мартонок аламошка ды кармасть пурнамо кудов.

— Садо течи инжекс Аловелев, — шождасто мерсь меельце пелев Рина. — Миньгак каванятадызь.

Минь варштынек вейке омбоцень лангс. Ды тесэ арсемскак а мезть!

Митряс саизе Светань номерэнзэ, ды тейтертне тусть Аловелев паниця яннэванть.

Минь прядынек пиянть, ёртынек суликанть куракш потс ды сыргинек кудов. Тесэ уш прянть потсо кармасть сокарямо лембе унжинетькак. Потмоёжонок кенярдозь ёзасть кедест, теке минь пионерт ды течи-ванды кучсамизь космосов.

— Кие тонеть седе вечкевсь? — кевкстсь Митряс.

— Аздан. Нама, Света.

— Мекс?

— Седе мазыйне.

— Ды ну уш. Карина седе вадря.

Карминек ледстнеме. Карина ульнесь сэрей, валдо черь марто. Света — нурькине раужо черь, алкине, чамалувозо теине, виде. Ды чарькодеви, мезть тесэ кортамс, Света седе мазыель. Монь туртов. Истя ладинекак. Мон, бути мезе, карман кутморямо Светань.

Кода ушосонть чопотетсь, минь ялго сыргинек Аловелев. Молемась — нилешка вайгельпеть. Ансяк минь аволь ютынек килангованть — мик ливтинек.

Митряс сёрмадсь эсэмэска, ды тейтертне вастымизь Киргизпесэ. Те — Аловеленть васенце курозо, бути ютамс Чукалсто.

— Адядо аштетяно косояк Киргизпесэ, — пшкадсь Света.

— А мезе, клубов а мольтяно? — кевкстинек минь.

— Мезе тосо тейнемс? — мерсь Рина. — Кунсоломс «Руки вверх» ды ваномс, кода тюрить иредезь цёратне? Аштетяно косояк тесэ.

Валгинек килангстонть Киргизпев ды сыргинек курованть. Кочкинек чаво кудо икеле эземне ды лоткинек сонзэ ваксс. Тейтертне озасть, минь кадовинек аштеме стядо.

Ушось, кадык умок чополгадськак, вельть лембель. Менельсэнть кармасть пургондомо тештинеть, ды коштось педе-пес шождалгадсь чикуншкань псинть эйстэ. Велекурось чаволь. Ансяк минек каршо порядкасонть палсь фонарь, валсь ашо валдонзо куронть куншкасо касыця каленть лангс. Ды онгсь косо-бути васоло кискине.

Минь таго карминек пеедькшнеме-човсеме тейтертнень марто теде-тонадо. Ды апак учо Света кевкстсь:

— Карматадо ченькстэ?

— Косто тынк? — васенце тевекс кевкстсь Митряс.

— Нуртинь аламошка сырькаень каськасто, — мерсь Света ды таргась эземненть алдо кескав.

— Минь жо алтакшнынек тынк каванямс, — пейдезевсь Рина.

Света таргась кескавстонть сулика, цяркинеть, кши, куярт-помидорт. Ульнесь ведь марто башка суликаяк.

— Аламошка! — мик рангстась Митряс.

Вейке ды пель литрас суликась пряс пештязель.

— А тынсь карматадо? — кевкстинь мон.

— Бути аламошка, — мерсь Рина. — Варчамонзо кисэ. Мон вана зярдояк эзинь варчне ченькс. А тынь?

— Ульнесь кода-бути… — пшкадсь Митряс ланга-прява ды поладсь покшкавтнезь: — Эно нуртяк сестэ. Мезть учомс.

Света кода маштсь нуртнесь цяркинетнева, ды минь саинек кедьс. Васенцекс симсь Митряс.

— Ну, вастовоманок кисэ! — мерсь сон ды ёртозь ёртызе симемапеленть кургос.

Мейле симинь мон, мельган — тейтертне.

— Ну, мон арсинь, карми седе берянь, — кортазевсь Карина, зярдо нилизе куяронь палнэнть. — А те мезеяк.

— Ну да, — пшкадинь монгак. — Аволь пек виевтнестэ.

Мейле симинек омбоценть, нуртинек колмоце… Кодаяк эзь чарькодеве, косто аламонь-аламонь пурнави мештенть потсо пициця лембесь, мекс пряпотсо ушоды мезе-бути вачкоеме. Ансяк кияк теде эзь корта. Сельменек кармасть цивтёрдомо, весемесь перьканок марявсь шождакс ды мельстуицякс.

Ветеце цяркадонть мейле тейтертне стясть, мерсть, курок сыть, ды тусть ков-бути веёнов, пирявксонть вакссо касыця куракштень потс.

— Кандсть кодамо-бути ведь. Татаргак а саи, — мерсь Митряс, саизе ченькс марто суликанть ды кармась симеме видьстэ кургова.

Сонзэ мельга текень теия монгак.

Апак учо куракштнень удалдо лиссь Света. Ве кедьсэнзэ нежедсь пирявксонтень, кортазевсь позанясто:

— Цёрат, тосо, теня, Рина а стяви. Сонзэ бу кудов…

Минь ютынек куракштнень удалов. Таго талакадынь, кода пильгетне теевсть стакакс, теке эйзэст недязельть гирят.

Рина озадоль модалангсо, кутьмерьсэнзэ нежедсь пирявксонтень ды чатьмонсь.

— Кудов… — арсезевсь Митряс. — Бути тосо фатить — иредезь?

— Повасызь, — мерсь Света, — Исень чиде икеле авазо сась. А мади, зярс Рина а сы кудов.

— Эряви сонзэ кельме ведьсэ, — кортазевинь мон. Ды ляд саевлизе! Келентькак эль сатокшность виензэ таргсемс валт. — Ули косояк маласо лисьмапря?

— Ули. Тона порядкасонть, — мерсь Света ды ландясь Ринань икелев, кармась шождынестэ вачкоемензэ чамаумарь ланга.

— Ялгинеть! Кода тынк тесэ вадря, — сась ёжос Рина. — Свал лембе…

Минь Митряс марто саинек сонзэ кавто ёндо ды кепединек. Мейле сыргинек курованть. Света — икеленек, ветясь лисьманть ёнов, минь колмонек — удалонзо. Ютась Света аволь вельть кеместэ. Кавксть эли колмоксть пупордякшнось, эль эзь пра. Минь жо, зярдо уш пачкодинек лисьмапрянть видьс, а ледстяви, кие васенцекс бипстась яннэнть трокс ёртозь чочконтень, весе колмонек рестедевинек пиже лугиненть лангс. Вадря, лугась чевтинель. Минь Митряс марто карминек гайтевстэ ракамо.

— Мезть цяхатадо? Стядо! — эсензэ ракамонзо эль кирдезь, мерсь Света.

Таргинек лисьмапрясто ведь. Васня симинек минсь, мейле Света ушодсь шлямо Ринань чаманзо. Те лездась, ансяк аволь пек. Пильгетне Ринань ялатеке эзть кунсоло.

— Васоло эри? — кевкстинь мон.

— Ды аволь пек. Теске, Киргизпесэ, — мерсь Света.

Минь ветинек Ринань кудонзо видьс ды шождасто лекстинек: тол вальматнесэ эзь пало.

Тесэ уш эсеньгак пильгень кевензасть. Нединь, а прамга, палисадникень пирявксонтень. Света кадовсь монь вакссо, Митряс ветизе Ринань кузтемпенть видьс.

Эзть кенере сынь чалгамо кузтемпень васенце лазонть лангс, кода терраскасо кирвазсь тол, кудыкельде марявсть эряза эскелькст, ды кудокенкшесь панжовсь. Митрясонь ды Ринань лангс прась ожо тол. Поровтонть лангсо аштесь ниленьгеменьшка иесэ ава.

— Вай, корьмакай-спаситель! — рукштядинзе кедензэ авась. — Те мезе тесэ истямось? Рина! Ды тон, некак, слепа иредезят!

Ринанень а мезе ульнесь ёвтамс тень каршо. Сон дельнесь Митрясонь лавтовонзо лангсо, теке кескав.

— Тон, паразит, симдик тейтерьканть?! — пижакадсь авась ды ушодсь «баславамо» Митрясонь тенстьсэ.

Митрясоньгак валонзо ульнесть аволь пек ламо. Сон ансяк снартнесь кекшеме прянзо кедьсэ. Теке шкане монь кедем ало ганкась сивсь, ды мон рестединь палисадникс, видьстэ ирисэнь цецятнень потс. Света мезе вийть кармась ускомон сиведе, снартнесь таргамс цецятнень потсто.

— Мезе тосо? — каятотсь кудыкельде цёраломанень эчке вайгель.

— Ды Чукалонсетне! — рангстась авась. — Симдизь Ринань ды ветизь кудов!

— Кирдть эйсэст! — таго марявсь кудыкельде. — Ужока, тонавтсынь!

Митряс нолдызе Ринань ды ношкстась минек ёнов. Мон самай лисевинь палисадникстэнть, ды минь колмонек напустинек куринкаванть.

Ёжос сынек ансяк эземненть вакссо, косо симинек ченькстэ.

— Ну, понгинек! — окойники муевсть Митрясонь валонзо.

— Ага. Максыть ней Ринанень, — мерсь Света ды капшазь поладсь: — Ладна, сырган кудов.

Мон варштынь сювордозь мокшнам лангс. Сонзэ потсо ульнесь мерьказь цецине, кона кода-бути уцордавсь тень Ринань палисадникстэ.

— Те тонеть, — меринь мон ды венстия Светанень цециненть.

Митряс, тень неезь, пейдезевсь, теке кургозонзо совась мекшвеле.

— Вастомазонок, — сизезь лекстясь Света, саизе цециненть ды сыргась кудо ёнов.

— Вастомазонок… — тошказевинек минь.

Пертьпельксэсь кармась ашолгадомо, эрявкшнось кодаяк пачкодемс Чукалов. Миненек таго, мезеяк лангс апак вано, марявсь — ченьксэсь ульнесь лавшине, «эзь сае» минек маралянь превтнень. Ды копордынек аламонь-аламонь видьстэ суликакургованть. Те ульнесь меельце байге.

Ве ёндо варштазь — теевинек алкуксонь ламбарекс. Ютынек кутморязь, кие кинь кандсь — эзь чарькодеве. Ды эрявсь тесэ лисемс истямонтень — тюрьгадынек. Карминек верьга вайгельть пелькстамо, кие седе мазый: Рина эли Света.

Митряс вачкодимим пилес, мон нединь сонзэ эйс, ды кавонек чопавтынек кинть куншкасо покш ведьлушмонтень, кона эзь коськекшне мик кизнаяк. Зярдо ойминек, тевесь уш теезель: оршамопеленек тюрякс начкольть, прясто пильгес рудаз потсолинек.

Лисинек кевень кинть лангс, озынек автобусонь лотксема таркантень. Вийть ков-бути ютамс арасельть. Чатьмонезь аштинек ды кунсолынек, кода кардазтнэсэ морыть атякштне, ванынек, кода ацави валскень сувось.

Ушосонть допрок ашолгадсь. Уш скалтнэньгак пансть ваномо. Сынь ютасть кинть ланга ды, кода тенек марявкшнось, нарьгазь парасть минек пелев.

— Цёрат! — пижакадсь скалонь ваныцятнестэ вейкесь. — Течи автобусось а сы!

— Минь содатано! — рангстась сонзэ каршо Митряс.

Ды карминек аштеме седе тов. Истя матедевлинекак, бути а лоткаволь ваксозонок мотоцикла. Эйсэнзэ озадоль Маляронь Рома. Монь шабрам. Тёмань лелязо. Сон кувать вансь минек лангс, мейле лоткавтызе моторонть ды окойники кевкстсь:

— Тынь истя косто? Тоначистэ?

Ды видеяк. Рудазовт, теке чопачат, вейкенть мик судозояк порксазь…

— Иля кевкстнеяк, — сизезь меринь мон.

— А мезть тесэ кевкстнемскак, — пейдезевсь Рома, — понгиде толонь веденть полонс! Ярь, кирнявтодо мотоциклас!

Минь озынек Романь удалов, ды сон нолдызе моторонть.

Митряс валгсь Алопень киулосонть. Зярдо Рома ускимим кудов, мон васенце тевекс молинь лисьмапряс. Шлия чамам ды тупор-тапор ювкстынь терраскантень.

* * *

Сыргозинь чикуншканть малава. Кудовальмало оймсемань апак сода парась шабратнень букаст. Те кодаяк эзь лезда толпандякс гувныця прям туртов. Мон стинь ды пильгесур лангсо лисинь кудыкелев. Тосо сырькаем куродымимгак.

— Тынь мезе ней? Симеме ушодыде? — кевкстимим аймельгадозь. — Алкоголикекс прянк теинк?

— Эзинек… — меринь мон.

— Коли! Терраскантень а соваваткак, ченьксэнь чинесь качады! — поладсь сырькаем. — Оршамопелеть рудаз потсот, теке кардазсо удыть! Онот, банякудыкеле лопавтинь.

Мон чатьмонинь. Арсинь, кода менемс ушов ды симемс лисьмаведте.

— Гайневтян вана авать туртов, невти теть тарабан! — мерсь сырькаем меельцекс.

Мон ёрвалдыя чамам, оршнинь ды сыргинь Митряснэнь.

«Те вана карми тев, бути сырькаем „мисамам“, — арсинь мон, зярдо ютынь велекурованть. — Сайсамизь кудов, ды весе — вастомазонок, кизэ!» Эскелинь челькев яннэванть седе тов, ды апак учо кармасть сакшномо седеяк покш мелявкст. Марявсь, эрьвась, кие понги каршон, соды, кода минь исяк симинек Аловелесэ, тюринек ды экшелинек рудазов ведьлушмосо. Вадря куш ютыцят каршон эзть понгоне, ды мон, аламодо оймазь, пачкодинь Митрясонь кудонзо видьс.

— Кудосо Дима? — кевкстия Митрясонь сырькаензэ.

Тона аштесь озадо кузтемпенть экше таркасо ды састыне кувсесь.

— Аздан, — мерсь сырькаесь, зярдо чарькодсь, кие ды косто кевкстни, — ков-бути баня ёнов тусь. Уштомонзо, паряк, арси таргонь куншкане? Кие соды, мезть лыки уш валскестэ саезь.

Молинь банянтень. Митряс озадоль кшнинь таза велькссэ, муськсь джинсанзо.

— Совак. Тесэ экше, — мерсь Митряс, зярдо неимим.

Мон озынь эземненть лангс. Банясонть видеяк ульнесь экше. Пряськак аволь истя сэредсь.

— Кода ёжось? — снартнесь мизолдомс Митряс.

— Седе вадря а ков.

— Понгинек минь исяк, — лекстясь Митряс ды поладсь нарьгазь: — Аламошка! Аволь виев! Вана теть аламошка! Вана теть аволь виев!

— М-да… — лекстинь монгак. — Тон мезекс исяк тюреме ушодыть?

— Мон ушодынь? — талакадсь Митряс. — Те тон васенцекс тулкадимик!

— Ладна эно… Мезть уш ней… — эзинь сода, мезе меремс. — Кода тосо тейтертне, аздат?

— Кода… Сёрмалесть эсэмэскат уш валскестэ саезь. Ринанень — арест. Кудостояк а нолдтнить… Светань сырькаезэ фатясь ёмазентень… Вадрясь мезеяк арась, — лекстясь меельцепелев Митряс.

— Ляд саевлизе те ченьксэнть! — кортазевинь апаркстомозь. — Кие ансяк арсизе модамасторонть лангс?!

Лисинек ушов. Кизэсь, минек пежетьксэнек лангс апак вано, сэтьмель. Калясь чипаесь, морась пиже тюссо лугась. Аштесь эсь таркасонзо Вежнясь, чиреванзо касыця куракштне ды чувтотне. Мезеяк эзь полавтово.

— Лия ёндо варштамс, — арсезевсь апак учо Митряс, — карматано ней содамо, кодамо те ялгась — велень ченьксэсь.

— Монень истят ялгат а эрявить, — меринь мон.

— Моненьгак, — видькстась Митряс.

Алтынек вейке-вейкенень: кадык куш ёндолось кавтов лазсамизь — ченьксэнть чинензэяк а нолдасынек малазонок те кизэстэнть. Сестэ, гувныця прятнень ёзамсто, истямо арсемась марявкшнось теке кшнистэ валозекс.

Аштинек аламос вейсэ, ды мон састынькине, теке пильгень ульнесть синдтрезь илевнекс, сыргинь кудов. Эсеньгак оршамопелем эрявкшнось муськемс…

Мазый тейтерька

Шкань ютазь минек «полонось» аламонь-аламонь стувтовсь. Сень кисэ — ванськавтыя пиренть идем тикшеде ды эрьва чи сезнинь Маруська сеянтень тарадт — сырькаем мезеяк эзь пачтя авань туртов. Ды кизэсь сыргась седе тов. Секе-тев уш якинек Аловелев, клубов, ансяк Ринань ды Светань марто эзинек аште. Виде, свал пейдинек карадо-каршо, зярдо вастовкшнынек, ледстнинек, кода симинек ченькстэ. Башка меремга, минь, кодат кшнинь алтамот эзинек стявтне, ялатеке таго варчакшнынек ченьксэнть чинензэ. Ансяк истямо полонс, кода сестэ, эзь лисекшне понгомс весе кизэнть перть.

Тевенек ютасть истя: чокшне якинек аволь клубов, аволь Аловелев — Михаловкав. Тосонь алюхатне (Антон ды Денис), конатне аумок састь каникулас Саранскойстэ, анокстасть вельть вадря аштема тарка. Михаловкань пирепетнень удало кияк уш а содыяк кона шкасто саезь аштесь ташто комбайна. Мик аволь «Ниваяк» — тунь тюштянь пингень. Антон ды Денис чавсть сонзэ ваксс кавто палманть, каясть комбайнанть эйстэ сынст лангс вельтявкс, тейсть стувор ды эземнеть.

Минь кода-бути сеске теевинек сынст марто ялгакс ды чокшнетнень, пелевес, ютавтынек тосо. Пултынек толпандя, пейдинек, кунсолынек, кода Антон налксесь гитарасо. Эрсесь, копоринек пиядо. Ульнесть минек кужинесэнть тейтертькак: Инна ды Рая. Митряс ильтякшнось кудов Иннань, Антон — Раянь. Минь Денис марто аштинек истяко, теке бобкат.

Ансяк весть, зярдо сынек Михаловкав, «минек» аштема таркасонть ульнесь од инже: кодамо-бути асодавикс тейтерька. Инна вастызе течи лавкасо ды тердизе аштеме минек марто.

Минь шумбракстнинек, теевинек содавиксэкс тейтеренть марто (лемезэль Катя), ды весемесь сыргась кода свал: сыремтинек толпандя, Антон таргизе гитаранзо. Пейдинек ды раксинек эсь юткованок. Катя — мон секе-тев салавинька ванынь сонзэ пелев — аштесь сэтьместэ. Чатьмонсь ды вансь толонть лангс, теке тосо палсть кодат-бути талакавтыця арсемат. Чамазо толпандянть апокшке валдонзо каршо марявсь мазыекс, састынестэ мизолдыцякс. Ансяк кенеринь нолдамо те меленть эсь пачкан, кода апак учо Катя стясь ды мольсь монь ваксс.

— Ютатано куваяк? — састо кевкстсь сон. — Сизинь тесэ аштемс.

— Адя, — меринь мон.

Ды минь туинек толпандянть эйстэ. Кияк Митрясто башка эзизе редяяк, кода минь шождынестэ нардавинек.

— Ков мольтяно? — кевкстия мон.

— Аздан, — кепединзе теине лавтовнензэ Катя. — Тон тесэ аборигенат, ветяк.

Карминек валгомо Михаловкань пандостонть ферматнень ёнов. Кись тесэ ацазель кевень плитасо, палсть кавто фонарть. Васенценть валдонзо ало мон варштынь Катя лангс. Лангсонзо ульнесь валдо джинсовка, секе тюсонь джинсат. Истямо оршамопелесь седеяк пек невтсь сонзэ ёлганя рунгинензэ. Кувака тюжа черензэ сравтозельть лавтовганзо, ды чамазо, монь ёндо ванозь, эзь неявкшно. Ансяк мон эзинь мелявто. Содылинь — сон ульнесь мазый.

— Косо тонавтнят? — кевкстия мон.

— Прядыя школанть, — лекстясь Катя ды поладсь: — Ней карман тонавтнеме экономикань факультетсэ.

Ютынек чатьмонезь кеменьшка эскелькст, ды мон таго кевкстинь:

— Лисни, вечкат ловомо?

— Ага, — нолдась мизолкске Катя. — Мон эзинь сода, ков молемс тонавтнеме, ды авам кучимим тов. А тон?

— Мон ансяк кеменценть прядыя. Мейле, нама, молян тонавтнеме филфаков.

— Цёраломань — филфаков? — талакадсь Катя. — Лисни, вечкат ловномо?

— Ули аламошка, — меринь мон.

Видеяк, терраскань стуворонть лангсо аштесть ветешка книгат, конатнень мон ускинь кудосто ды аламонь-аламонь ловнынь. Самай ней мольсь К. Абрамовонь «Пургаз» романонть шказо.

Минь кортазевинек седе тов, ды лиснесь, Катяяк, экономикань факультетс молеманть лангс апак вано, вечксь ловномо. Монь коряс, талакадынь, ловнось седеяк ламо. Ёвтнесь истят сёрмадыцят, конатнень лемест эзинь марсеяк: Сэлинджер, Франсуаза Саган… Ды зярс молинек фермань кевень килангованть, кортнинек ловнозь книгатнеде. Кавонек туртов эзь вечкеве рузонь «эчке классикась»: Толстой, Достоевский, Куприн. Ды весе валморотне. Есениндэ башка, чарькодеви.

— Минек тонавтыцясь кортась, те — зярс одтано, — мерсь Катя.

— Нама, а манчи, — эзинь пелькста мон.

Ды валом мельга ферманть кардазонзо ёндо гайтевстэ паразевсь скал. Минь пейдезевинек. Ладинек — сонгак аштесь минек арсеманок марто велув.

Омбоце фонаренть ало мон таго варштынь Катя лангс. Ансяк ней сонгак велявтызе прянзо монь ёнов, ды вановтонок вастовсть. Минь мизолдозевинек ды чатьмонезь сыргинек седе тов.

Икеленек ульнесь Вежнянть трокс кшнинь сэдесь. Минь ютынек сонзэ ланга, ды пилезэнек каятотсь веденть чудемань вайгелезэ. Зярдо лисинек Кавлейка куронь кинть лангс, ведень чольдердемантень човорявсть нармунень вайгельть, конатне морасть косо-бути авасоло. Марявсь, истямодонть седе вадря ды мазый — а эрсияк. Минь чатьмонезь аштинек сэденть вакссо ды кунсолынек чокшненть. Учинек, кие васенцекс кортазеви.

— Ков ней? — кевкстсь Катя ды варштась верев. — Зярдо менельсэнть истя ламо тештеть?

Кепедия прям монгак ды ансяк ней редия: менелесь пештязель тештесэ. Сынь ёртнезельть чопода-сэнь паксяванть, теке ашо кснавнеть.

— Мон аздан, кода вешнемс кинть тештетнень коряс, — меринь. — Бути ули мелеть — ютатано Веле сёлтонтень.

— Мон ульнинь тосо чить. Экшелинек, — пшкадсь Катя.

— Чить — те чить. Чокшне — тунь лия тев.

— Кеман, истя улияк, — мизолдозевсь Катя. — Сестэ адя эно тов.

Минь сыргинек велень прявт киванть, ютынек лавканть, клубонть, ды лисинек Мукорькапень ушодксонтень. Те куронть пирепензэ удало ульнеськак сёлтось. Аштесь, ловт, веленть куншкасо, секс истя лемдезельгак.

Зярдо кузинек сёлтонь сэрей дамбантень модас теезь чалгамотнева, мон ютынь икелев ды венстия Катянь туртов кедем. Сон максызе эсензэнть, ды минь кузинек верев. Седе тов ульнесь чопода, теине яннэванть минь истя жо ютынек кедте-кедьс кундазь. Катянь кедезэ ульнесь лембе, мик пси. Эли монсесь вельть кельмель.

— Минь вана тосо экшелинек, — невтсь Катя.

— Содан мон тесэ вейке таркине, — меринь мон. — Иля пеле.

— А пелян, — пейдезь кортазевсь Катя. — Те тонеть эряви пелемс.

— Саты тандавтнемс, зярс эзинь оргоде, — пеедькшнинь монгак.

«Таркась» те ульнесь сёлтонть ушодкссо, ансяк ялатеке а сеске редявкшнось, кекшезель калькуракштнень потсо. Чирестэнть, веденть ёнов кеменьшка эскелькст, ютась чувтонь сэдне. Сонзэ лангсто сеедьстэ кундсесть калт, сайнесть, кинь пирезэ авасоло, эмежтнень валномга ведь.

Минь састынькине ютынек чикордыця сэденть лангс ды стинек сонзэ песэ.

— Кода арсят, ведесь лембе? — кевкстсь Катя.

Мейле ландясь, токизе веденть кедьсэ.

— Лембе, — кецязь яволявтсь.

— Те бути варчамс кедьсэ, — меринь мон. — Кедтне свал марить лембенть. Тон пильгеть навик.

— Эряви варчамс.

Катя каинзе котанзо, илештинзе джинсанзо ды озась сэдненть лангс, нолдынзе пильгензэ ведентень.

— Видеяк, якшамо, — мерсь Катя ды кармась састынестэ пулькамо ведьсэнть.

Мезеяк эзь кадово, кода теемс секенть, ды мон озынь сонзэ ваксс. Ведесь якшамоль, ансяк мейле, зярдо тонадовсь, теке мерят куцтясь пильгетнень.

Ды ульнесь вадря. Варштамс ланга-прява — тунь мезеяк. Вана минь, лавтовонок вейс нежедезь, аштетяно чаво сёлтонть лангсо, чатьмонезь вантано сэтьме ды чопода ведензэ лангс, кона эль валдомтозь ковонть ды тештетнень валдосост. Ансяк ульнесь вадря. Марявсь мик сеске — те зярдояк а стувтови.

— Содылить? Бути аламодо конямс сельметнень, — апак учо ушодсь Катя, — ды варштамс тештетнень лангс, маряви, сынь тунь аволь васолот. Венстик кедеть — ды саик, — ды сон видеяк конинзе сельмензэ, венстинзе кедензэ менелентень.

— Мон лиякс налксян тештетнень марто, — варштынь верев монгак.

— Кода?

— Ванан сынст лангс ды вешан, мезесь эряви весемеде пек.

— Ды… мезе вешевлить ней?

— Аздан. А тон?

— Монгак.

— Сестэ, ловт, минь малавикс ломанть, — пшкадинь мон. — Кавонек мезеяк аздатано…

— Паряк, а эрявияк.

— Мезе а эряви?

— Содамс, — мерсь Катя, ды чатьмонезевинек.

Аштинек аламос сэдненть лангсо ды сыргинек мекев велекуронтень. Клубось уш пекстазель, ансяк ялатеке тестэ-тосто марявкшность од ломанень вайгельть. Велень кудотне умок удость: вейкеяк вальминесэ эзь неяво тол.

— Арась кодамояк авейкетьксчи, — мерсь Катя. — Ош, веле… Свал кие-бути уды, кие-бути — арась.

— Мезе, тоньгак сась удомат? — кевкстия мон.

— Арась, — мерсь Катя. — Кизэнь ветне — аволь тень туртов.

Мон кецязевинь эсь пачкан, ды минь апак капша сыргинек седе тов. Молинек Алопева. Ютынек курованть ды кортнинек эрьва мезде: вечкевикс фильмадо, мородо, ёвтнинек пеедькшнемат-мезть. Кортнемс Катя марто ульнесь шожда. Ансяк кодаяк эзь цётавкшно шкась, зярдо таго саемс сонзэ кедензэ, кутмордамс, паламс.

Школанть каршо, мон содылинь, ульнесь эземне. Ды минь, оймсемга, молинек сонзэ ваксс. Озынек малацек, ды Катя апак учо нежедизе прянзо монь лавтос. Марявсь, кода тантейстэ качадыть черензэ. Мон састо венстия кедем ды кутмордыя Катянь.

— Мон эзинь кельме, — мерсь Катя.

Ушосонть видеяк ульнесь лембе. Ансяк мон ялатеке эзия сае кедем. Истя аштинекак кутмордазь.

— Тон — эзить, а монень — якшамо, — окойники муевсть каршо валон.

— Кода тон арсят, — ушодсь Катя апак учо, — мезекс вейке ломанесь эряви омбоцентень? Саемс лембензэ эли максомс эсензэнть?

Теде мон зярдояк эзинь арсе. Ютынь коволтнэнь мельга, конатне кецясть потсон: вана сон, мазый тейтерькась, ашти тонь вакссо. Мезекс вешнемс седе ламонть?

— Те уш, нама, кинь кода лиси, — савсь меремс тень.

— Мезекс — кода лиси? Эряви — весенень улезэ лембе, — ды Катя седеяк пек нежедсь монь эйс.

— Кунсолок… — меринь мон. — Тон а сёрмадат валморот?

— Арась? А мекс?

— Истяко. Арсемат кодат-бути покшт. Мазыйть.

Истя, мерть, ки соды мезде, кортнинек пелевес. Ильтия Катянь кудонзо ваксс, зярдо пертьпельксэсь ушодсь ашолгадомо, азаргадозь моразевсть атякштне.

Чатьмонезь аштинек кудонзо икеле рацяня покш каленть ало ды эзинек сода, мезе теемс седе тов.

— Вастомазонок, — мерсь Катя ды аноколь туемс.

— Ужо, — лоткавтыя мон. Ды палыя чамаумарьс.

Катя талакадозь варштась чамазон, мизолдозевсь. Стясь пильгесур лангс ды истя жо палымим чамаумарьс.

— Вастовтано ванды? — кевкстинь капшазь.

— Вастовтано, — мерсь Катя.

— Сестэ неемазонок. Сэтьме ве теть!

— Ды уш сэтьме валске, — мизолдозевсь Катя ды сыргась кудопирявксонть ёнов.

Мон ютынь килангованть ды ледстнинь Катянь чамаумарензэ танстенть. Эль эзинь кирнявтне, кода вадрясто весемесь лиссь те чокшнестэнть.

Вежнянть трокс сэденть вакссо апак учо вастовинек Митря марто.

— Ну мезе, палсиде? — сеске кевкстсь сон.