Бесплатный фрагмент - Iибадатехь леладан магийна хи

ДЕШХЬАЛХЕ

Альхьамду лилла́х1и роббил 1а́ламийн. Ва ссола́ту ва ссала́му 1ала росу́лилла́х1и ва 1ала а́лих1и ва асхьа́бих1и ажма1ийн вам ан таби1ах1ум биихьсанин ила́ явмиддийн. Амма ба1ду:

Ассаламу 1алайкум, лараме бусалба нах!

Ислам — дин ц1аналлин дин ду. Бусалба стаг ц1ена хилар лоьху Ислам дино. Цундела, дукх ч1ог1а лерина терго йина шарий1ата бусалба стага 1ибадатехь лелон дезачу хина. 1ибадатехь хи леладар бохург — муьлха 1амал йу хи леладарца йеш йолу. Масала: ламаз эцар, нажасац бехъйелла меттиг ц1анъйар, дег1ах хи кхарзар, кхин а 1ибадаташ хица кхочуш деш долу. Царех лаьцна 1илма хила деза бусалба стегехь а, зудчуьнгахь а. Цундела, цунах дерг билгал деш язъдина вай х1ара жайна. Веза-Сийлахь Дала пайде дойла х1ара бусалба нахан.

Шовхал Сайд-Селиман кIант Хьусайн

2 Зульхьиджа-бетта 1447 хI. ш.=

16 Х1утосург-бутт (май-месяц) 2026 ш.

08:39.

ХИН ДАКЪОШ

Шарий1атехь хи деъ декъе доькъу:

1— Т1ох1у́р

2— Т1о́х1ир

3— Нажисун

4— Муста1мал

1-Т1ОХ1У́Р

Т1ох1у́р хи, — иза Дала ша ма кхоллара долу хи ду цуьнан муьлха бос а, чам а балахь, муьлха хьожа а ялахь. Иза ша ц1ена ду, кхийолу х1ума ц1ан ялур долуш ду. И хи бен 1ибадатехь лело магийна дац шарий1атехь, х1унда аьлча и хи ша ц1ена ду, кхи йолу х1ума ц1ан ялур долуш ду. Цундела иза кхечу хих къасто хаа деза бусалба стагна.

Масала: Дог1ан хи, х1ордан хи, татолан хи, г1у чуьра хи, шовдан хи, луонах я шанах даьккхина хи, — церан муьлха хьожа я чам я бос хилахь а. Иштта Дала кхоьллина долу муьлха хи 1ибадатан ц1ена ду, иза Дала ша ма кхоллара далахь.

Амма т1ох1у́р хи йовхо лаьттачу бовхачу махкахь, эчигах я ц1естах йолу пхьег1а чохь малхехь дохделла долуш леладар дика дац, х1унда аьлча, цунах ч1оьран лазар долун дера. Амма шел делча лело мегар ду иза.

2-Т1О́Х1ИР

Т1ох1у́р хи, — иза Дала ша кхоьллинчу куьцера ц1еначу х1уманца хийцаделларг ду. Ц1ена хи ду иза, делахь а шех кхеттачу ц1еначу х1умано хийцина ду. Дала кхоьллина ц1ена хи шен куьцера д1адалар хуьлу, цунах кхеттачу ц1ена х1ума бахьна Дала ша кхоьллинчу басах я чомах я хьожах цхьаъ хийцадаларца. И хийцадалар шина кепара хуьлу цуьнан:

1—1аламан бахьанца хийцадалар.

2-Цхьам хийцар.

1—1АЛАМАН БАХЬАНЦА ХИЙЦАДЕЛЛА ХИ:

Адамо я кхийолу чохь са долчу х1умано хийцина а доцуш, 1аламан бахьанца ша хийца делла хи ц1ена ду, т1ох1у́р ду иза, 1ибадатехь лело мегар ду.

Масала:

— Дукха лаьттина шен хьожа хийцаелла я чам хийцабелла я бос хийцабелла хи, — и хи т1ох́ур ду. И бохург, кху тайпа хи 1ибадатехь лело мегаш ду.