Бесплатный фрагмент - Пухпря левкстнэнень

Алтави покштян-бабан туртов:

Бектяшкинтнэнень, Калинкинтнэнень,

Кузнецовтнэнень ды Шикаевтненень

Сундерьгалесь.

Чинь псинть полавтомо апак фатя сась чокшнень экшесь. Весе эриесь окойники шождасто лекстясь.

Тикшетне ды ракшатне анокстасть мадеме. Эрьва ков эциця маравтнэ сыргасть ушова ливтнеме. Те шкане сыре пухпрясь пурнась-тейсь удомадо икеле кортнеме пухприне нуцькинензэ марто.

— Кезэрень пухпрятне ёвтнесть, келя, эрямонь сехте покш питнейчитне — те эсеть кочкамось ды Варманть эрявикс ёнксов пувамозо. Мон жо тенк мерян, те ансяк валт. Сехте покш питнейчись — те вакссот касыця тетянь-авань лопинесь!

Пухпринетне абунгадозь варштасть вейке-вейкень лангс.

— Покштяй, мекс тетянь-авань лопась — те питнейчи? — кевкстясь пухпринесь.

— Истяк. Сы шка — тынсь весементь чарькодьсынк! — музгордсь атясь.

«Н-да, шкадо икеле те, зярс эзть касо», — арсезевсь сыре пухпрясь ды марямга мерсь:

— Мадеде. Шказо талай.

Покштянь валтнэ эзть лисне пухприненть прясто, ды сон кодаяк эзь матедеве:

— Покштяй, ёвтник, эрь, ёвтник, мезде тон кортыть. Кода тень чарькодемс? Явик мартон эрямонь превейчить!

— Превейчинть… эли чаволачинть — сельмень апак панжо ачарькодевиксстэ пшкадсь каршонзо атясь.

— Ёвтнесак? — эзь пота нуцькинесь.

— Мезе эно, кунсолок, — атясь автсь курго ды ушодсь апак капша ёвтнеме.

Мазый пандочиресэ эрясть пухпрят. Чевте седейнетнень кольневтсь ванькс коштось ды Чинть авань певтеме вечкемась.

Эштё чадыковсто, зярдо солась ловось, пухпринетне вейсэ лиссть чинть каршо ды ней мельспаросо эрясть. Вечкевсть ракшанень, нармуннень, эрьва ютыцянень.

Сынь венстявсть Чипаентень, казсть масторлангонтень сыреждиця мизолксост ды седешкава кецнесть эрьва чинтень.

Эрьва валске Чипаенть васенце налонзо марто вейке омбоце мельга сырголесть пухпринетне, тантейстэ венстнесть рунгост ды путнесть прязост валдо ожо шапкинест. Чивалгомане, матевемадо икеле, сынь арсесть весе касыцятненень, ёзмолдыцятненень, чийницятненень, якицятненень ды ливтницятненень сэтьме лембе ве ды тантей онт. Истя мельга-мельцек ютнесть читне.

Чадыковонь экшеденть мейле сась панжиковонь лембе. Пухпринетне теевсть покш пухпря цёракс ды пухпря тейтерекс: ветясть покшонь кортамот, тейнесть кудораськеть ды уш тия-тува арсесть эйдеде. Эзь кенере эсь прядонзо яволявтомо аштемковонь псись, кона теинзе пухпрятнень тетякс-авакс, кода сась медьковось пултыця псинзэ марто.

Медьковонтень сехте пек кецнесь Чипаесь. Ней сон олявсто невтсь триця авань вечкеманзо ды апак жаля псистэ кутморясь весе эриенть ды аэриенть, кучсь Модантень вечкемань апрядовиця чудикерькст.

Пухпрятне эзть редя пертьпельксэнь полавтовоматнень. Сынь прянек тусть эйкакштнес. Эрявсь ёвтнемс эйдетненень пандочиресэ эрямо койтнеде, мезде эряви пелемс, шабратнень мелест ваномадо ды тонавтомс сенень, мезе содасть сынсь.

«Весементь кенеремс тееме!» — мелявтсть пухпря цёратне ды аватне.